ឧត្តមសេនីយ៍ឯក លឹម តុងហួត៖ យុវសិស្សជាធនធានដ៏មានសក្តានុពលជួយទប់ស្កាត់ការរីករាលបញ្ហាគ្រឿងញៀនចូលទៅក្នុងសហគមន៍

ភ្នំពេញ៖ ឯកឧត្តម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ: នៃអគ្គលេខាធិកាដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ជម្រាបជូនបែបនេះក្នុងពិធីផ្សព្វផ្សាយពីផលប៉ះពាល់នៃគ្រឿងញៀននិងបារីអេឡិចត្រូនិកជូនដល់លោកគ្រូ អ្នកគ្រូ បុគ្គលិក និងសិស្សានុសិស្សពីថ្នាក់ទី៧ ដល់ថ្នាក់ទី១១ ចំនួន២៥២នាក់ ស្រី១៧១នាក់នាថ្ងៃទី៣០ ខែមករា ឆ្នាំ២០២៤ នៅសាលាអន្តរទ្វីបអាមេរិកាំងសាខាសែនសុខ។

លោក សោម ចាន់ណា នាយកចាងហ្វាងសាលាអន្តរទ្វីបអាមេរិកាំងសាខាសែនសុខ បានមានប្រសាសន៍ថា ការគិតគូរយកចិត្តទុកដាក់ដល់សុខភាពគឺបញ្ហាសំខាន់ចំពោះសិស្សានុសិស្សដែលជាធនធាននិងក្តីសង្ឃឹមសម្រាប់គ្រួសារ។

ថ្លែងក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ក្នុងឱកាសនោះ ឯកឧត្តមឧត្តមសេនីយ៍ឯក លឹម តុងហួត បានអរគុណ និងកោតសសើរដល់គណគ្រប់គ្រងសាលាអន្តរទ្វីបអាមេរិកាំងសាខាសែនសុខក៏ដូចជាថ្នាក់ដឹកនាំកំពូលរបស់សាលាដែលចូលរួមសហការអនុវត្តតាមយុទ្ធសាស្រ្តពហុវិស័យ និងយុទ្ធនាការប្រយុទ្ធប្រឆាំងគ្រឿងញៀន ក៏ដូចជាបទបញ្ជានានាសំដៅរក្សាបាននូវសុខភាពសុវត្ថិភាពដល់សិស្សទាំងក្នុងសហគមន៍និងគ្រឹះស្ថានសិក្សា។

ក្នុងឱកាសនោះដែរ ឯកឧត្តម ឧត្តមសេនីយ៍ឯក លឹម តុងហួត បានបន្តថា រាជរដ្ឋាភិបាល នីតិកាលទី៧ នៃរដ្ឋសភាដឹកនាំដោយសម្តេចបវរធិបតី ហ៊ុន ម៉ាណែត បានដាក់ការងារប្រយុទ្ធប្រឆាំងគ្រឿងញៀនជាការងារអាទិភាពហើយការងារនេះជាការរួមរបស់យើងទាំងអស់គ្នា។

ឆ្លើបតបទៅនឹងការងារនេះ អាជ្ញាធរជាតិប្រយុទ្ធប្រឆាំងគ្រឿងញៀនដឹកនាំដោយឯកឧត្តមសន្តិបណ្ឌិត នេត សាវឿន ដែលបានដាក់ចេញនូវសេចក្តីណែនាំចាត់តាំងអនុវត្តការងារប្រយុទ្ធប្រឆាំងគ្រឿងញៀនសំដៅបង្ការ ទប់ស្កាត់បញ្ហាគ្រឿងញៀនកុំឱ្យជ្រៀតចូលរីករាលក្នុងសហគមន៍និងឈានទៅលុបបំបាត់បញ្ហាគ្រឿងញៀនគឺជាការសំខាន់ណាស់ដែលតម្រូវឱ្យយើងទាំងអស់គ្នាត្រូវរួមគ្នាជួយគ្នាធ្វើយ៉ាងណាឱ្យប្រជាពលរដ្ឋគ្រប់រូបត្រូវតែទទួលបានចំណេះដឹងឬព័ត៌មានពិតពីបញ្ហាគ្រឿងញៀន។

ជាមួយគ្នានេះ ឯកឧត្តម ឧត្តមសេនីយ៍ឯក លឹម តុងហួត បានបន្ថែមទៀតថា យុវសិស្សនៅក្នុងវ័យ១៣ឆ្នាំ ដល់១៨ឆ្នាំនេះ គឺជាវ័យមួយដែលឆាប់ទទួលយកនូវអ្វីៗដែលថ្មី ហើយយុវសិស្សជាធនធានដ៏មានសក្តានុពលអាចជួយបង្ការទប់ស្កាត់ការរីករាលបញ្ហាគ្រឿងញៀនចូលទៅក្នុងសហគមន៍។

តាមរយ:វាគ្មិន លោកឧត្តមសេនីយ៍ត្រី យិន យឿត និងលោកឧត្តមសេនីយ៍ត្រី ឈិន ភូមា បានឱ្យដឹងថា សិស្សទាំងអស់ពិតជាក្លាហានខិតខំចូលរួមសកម្មភាពជាមួយវាគ្មិន ស្តាប់ ចែករំលែកចំណេះដឹង និងចម្ងល់នានាពីបញ្ហាគ្រឿងញៀនហើយពួកគាត់នឹងជួយផ្សព្វផ្សាយបន្តពីបញ្ហាគ្រឿងញៀននិងបារីអេឡិចត្រូនិកនេះដល់ក្រុមគ្រួសារនិងមនុស្សជាទីស្រឡាញ់របស់ពួកគាត់ ៕