លោកជំទាវ តឹករ៉េត កំរង ដឹកនាំកិច្ចប្រជុំបច្ចេកទេស សម្រាប់កម្មវិធីអភិវឌ្ឍន៍ សម្រាប់ពាណិជ្ជកម្មតំបន់

ភ្នំពេញ៖ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម តំណាងដ៏ខ្ពង់ខ្ពស់របស់ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានដឹកនាំកិច្ចប្រជុំបើក និងកិច្ចប្រជុំបច្ចេកទេសសម្រាប់កម្មវិធីអភិវឌ្ឍន៍សម្រាប់ពាណិជ្ជកម្មតំបន់ (Regional Trade for Development – RT4D) នៅទីស្តីការក្រសួងពាណិជ្ជកម្ម នាព្រឹកថ្ងៃពុធ ទី៣១ ខែមករា ឆ្នាំ២០២៤ ម្សិលមិញនេះ។

កិច្ចប្រជុំនេះធ្វើឡើង ដើម្បីជំរុញការអនុវត្តជំពូកកិច្ចសហប្រតិបត្តិការបច្ចេកទេស និងសេដ្ឋកិច្ច ក្រោមកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងកិច្ចព្រមព្រៀងពាណិជ្ជកម្មសេរីអាស៊ាន-អូស្រ្តាលី-នូវែលសេឡង់ (AANZFTA) ក្នុងគោលបំណងពិភាក្សា និងបកស្រាយពីការរំពឹងទុក វិធីសាស្រ្ត ការអនុវត្តផែនការសកម្មភាព និងទំនួលខុសត្រូវរបស់ភាគីពាក់ព័ន្ធ រួមមាន ក្រសួងពាណិជ្ជកម្ម អន្តរក្រសួង-ស្ថាប័ន និងភ្នាក់ងារអនុវត្ត RT4D ព្រមទាំងផ្តល់ព័ត៌មានលម្អិតពីការដាក់ស្នើ និងរៀបចំសំណើគម្រោងនានា ដើម្បីទាញយកផលប្រយោជន៍ជាអតិបរមាពីកិច្ចព្រមព្រៀងពាណិជ្ជកម្មទាំងពីរ៕