សម្ដេចមហាបវរធិបតី ហ៊ុន ម៉ាណែត និងលោកជំទាវ ផ្ដល់អំណោយដល់ប្រជាពលរដ្ឋក្រីក្រ ក្នុងស្រុករលាប្អៀរ
ភ្នំពេញ៖ ឯកឧត្តមឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃសុក្រ ទី២ ខែកុម្ភៈ ឆ្នាំ២០២៤ បាននាំយកអង្ករចំនួន ១០០គីឡូក្រាម ទឹកត្រី០១យួរ ទឹកស៊ីអ៉ីវ០១យួរ ត្រីខ០២យួរ មី០២កេះ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ទៅឧបត្ថម្ភដល់គ្រួសារប្រជាពលរដ្ឋក្រីក្រ ជួបការលំបាកខ្លាំង ០១គ្រួសារ មាន ឪពុកឈ្មោះ សៀន ដានី ម្តាយឈ្មោះ ស៊ន ចាន់ថន កំពុងជាប់ពន្ធធនាគារទាំងប្តីប្រពន្ធ និង មានកូនចំនួន ១០នាក់ ប្រុស០៧នាក់ ស្រី០៣នាក់ ពុំមានដី ផ្ទះ រស់នៅ ដែលបច្ចុប្បន្នកំពុងស្នាក់នៅបណ្តោះអាសន្នលើផ្ទះប្រជាពលរដ្ឋ នៅភូមិត្រពាំងអញ្ចាញ ឃុំក្រាំងដីមាស ស្រុករលាប្អៀរ ខេត្តកំពង់ឆ្នាំង ។ ដោយឡែកក្មេងៗប្រុសៗដែលមានកម្លាំងអាចធ្វើការបាន នៅពុំទាន់មានការងារ ឬ មុខរបរអ្វីច្បាស់លាស់ ដើម្បីរកចិញ្ចឹមជីវិតនៅឡើយទេ ។
មានប្រសាសន៍សំណេះសំណាល នាពេលនេះ ឯកឧត្តម មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខរបស់ សម្តេចធិបតី និងលោកជំទាវ ចំពោះប្អូនៗកូនចៅទាំងអស់គ្នា ។ ឯកឧត្តម មេបញ្ជាការ បានណែនាំដល់ក្មួយៗដែលមានកម្លាំងធ្វើការ ត្រូវបន្តរកការងារធ្វើ ទោះការងារអ្វីក៏ដោយឲ្យតែសុច្ចរិត សុទ្ធតែមានតម្លៃទាំងអស់ ។
