ឯកឧត្តមសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ ដឹកនាំកិច្ចប្រជុំស្ដីពីការពង្រឹងការងារបុគ្គលិក និងផ្សព្វផ្សាយឯកសារមួយចំនួនពាក់ព័ន្ធនិងការងារបុគ្គលិក

ភ្នំពេញ៖ នៅព្រឹកថ្ងៃសុក្រ ទី២ ខែកុម្ភៈ ឆ្នាំ២០២៤ ឯកឧត្តម សន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ អញ្ជើញដឹកនាំកិច្ចប្រជុំស្ដីពីការពង្រឹងការងារបុគ្គលិក និងផ្សព្វផ្សាយឯកសារមួយចំនួនពាក់ព័ន្ធនឹងការងារបុគ្គលិក ដោយមានការអញ្ជើញចូលរួមពីអនុរដ្ឋលេខាធិការ ថ្នាក់ដឹកនាំតំណាងអគ្គស្នងការដ្ឋាននគរបាលជាតិ អគ្គលេខាធិការ អគ្គនាយកដ្ឋានចំណុះក្រសួងមហាផ្ទៃ និងក្រុមការងារពាក់ព័ន្ធជាច្រើនរូបផងដែរ។

ឯកឧត្តម សន្តិបណ្ឌិត ចាន់ អ៊ាន បានមានប្រសាសន៍ថា យោងតាមប្រសាសន៍ណែនាំដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស​ សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អនុញ្ញាតឱ្យមានការរៀបចំកិច្ចប្រជុំនាថ្ងៃនេះ ដើម្បីពង្រឹងរបៀបរបបការងារ លំហូរឯកសារទាក់ទងនឹងការងារគ្រប់គ្រងមន្ត្រីនគរបាលជាតិ និងផ្សព្វផ្សាយសេចក្ដីណែនាំស្ដីពីការអនុញ្ញាតច្បាប់ឈប់សម្រាកពីការងាររបស់មន្ត្រីនគរបាលជាតិ និងសេចក្ដីជូនដំណឹងនានាមួយចំនួនទៀត។

ឯកឧត្តមបានបន្ថែមថា ការពង្រឹងរចនាសម្ព័ន្ធដែលមានស្រាប់ គឺជាកិច្ចការងារចាំបាច់ សម្រាប់ជាយន្តការបន្តនិរន្តរភាពការងារ ក៏ដូចជាពង្រឹង និងកែទម្រង់ស្ថាប័ន សំដៅរួមចំណែកអនុវត្តតាមកម្មវិធីនយោបាយ និងគោលដៅអាទិភាពដែលរាជរដ្ឋាភិបាលបានដាក់ចេញ។

ឯកឧត្តម សន្តិបណ្ឌិត បានណែនាំឱ្យស្ថាប័ន និងអង្គភាពចំណុះទាំងអស់ត្រូវពង្រឹងការអនុវត្តវិន័យ និងចូលរួមអនុវត្តតាមខ្លឹមសារនៃសេចក្ដីណែនាំ និងសេចក្ដីជូនដំណឹង ដោយស្មារតីទទួលខុសត្រូវខ្ពស់ និងប្រកបដោយប្រសិទ្ធភាព៕