ប្រធានក្រុមការងារគណបក្សប្រជាជនកម្ពុជាចុះជួយខេត្តតាកែវ អំពាវនាវអង្គបោះឆ្នោតព្រឹទ្ធសភាបោះឆ្នោតជូនគណបក្សប្រជាជនឱ្យបានគ្រប់ៗគ្នា

ភ្នំពេញ៖ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងារគណបក្ស និងរាជរដ្ឋាភិបាលចុះជួយមូលដ្ឋានខេត្តតាកែវ បានអំពាវនាវដល់អង្គបោះឆ្នោតទាំងអស់សូមនាំគ្នាទៅចូលរួមបោះឆ្នោតនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខឱ្យបានគ្រប់ៗគ្នា ហើយបោះឆ្នោតជូនគណបក្សប្រជាជនកម្ពុជា។

ថ្លែងនៅក្នុងឱកាសអញ្ជើញចុះជួបសំណេះសំណាលជាមួយក្រុមប្រឹក្សាឃុំ សង្កាត់ ក្នុងដំណែងរបស់គណបក្សប្រជាជនកម្ពុជាទូទាំងក្រុងស្រុក ដែលជាអង្គបោះឆ្នោតជ្រើសតាំងសមាជិកព្រឹទ្ធសភានៅពេលខាងមុខនេះ រយៈពេល២ថ្ងៃ គឺថ្ងៃទី ០៣ ទី០៤ ខែកុម្ភៈ ឆ្នាំ២០២៤ ដែលរៀបចំធ្វើឡើងនៅសាលប្រជុំគណបក្សស្រុកសំរោង គណបក្សស្រុកគិរីវង់ និងមន្ទីរបក្សខេត្ត ឯកឧត្តម ជា វ៉ាន់ដេត បានថ្លែងបន្តថា សម្រាប់ខេត្តតាកែវស្ថិតនៅភូមិភាគទី៥ ដែលមានខេត្តតាកែវ កំពត និងខេត្តកែប ដែលមានអសនៈព្រឹទ្ធសភាចំនួន៧អសនៈ ហើយបើគិតអង្គបោះឆ្នោតគណបក្សប្រជាជនកម្ពុជា យើងទទួលបាន៦អសនៈរួចទៅហើយ ដូច្នោះយើងបន្តខឹតខំនិងប្រឹងប្រែងធ្វើយ៉ាងណា ឲ្យគណបក្សប្រជាជនកម្ពុជាទទួលបាន ៧អសនៈនៅភូមិភាគទី៥នេះ។

ឯកឧត្តម ជា វ៉ាន់ដេត បានមានប្រសាសន៍បន្ថែមថា អង្គបោះឆ្នោតជ្រើសតាំងសមាជិកព្រឹទ្ធសភាទាំងអស់ត្រូវត្រៀមឯកសារមួយចំនួនដែលមានសុពលភាព ឬប័ណ្ណសម្គាល់ខ្លួន ជាក្រុមប្រឹក្សាឃុំសង្កាត់ ដើម្បីអាចចូលរួមបោះឆ្នោតបាន ជាពិសេសសូមថែរក្សាសុខភាពរបស់ខ្លួនផងដែរ ។

ឯកឧត្តម ជា វ៉ាន់ដេត បានបន្ថែមថា សម្រាប់គណបក្សប្រជាជនកម្ពុជា បេក្ខភាពប្រធានព្រឹទ្ធសភាគឺសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាអតីតនាយករដ្ឋមន្រ្តី ដែលបានដឹកនាំប្រទេសកម្ពុជាអស់រយៈពេលជាង៣០ឆ្នាំ និងធ្វើឲ្យប្រទេសជាតិមានការអភិវឌ្ឍន៍រីកចម្រើនយ៉ាងខ្លាំងក្លា។

ឯកឧត្តម ជា វ៉ាន់ដេត បានបន្ថែមឱ្យដឹងទៀតថា នៅពេលគណបក្សប្រជាជនកម្ពុជាឈ្នះឆ្នោតមានន័យថាប្រជាជនជាអ្នកឈ្នះ ហើយគណបក្សប្រជាជនកម្ពុជានិងបន្តកិច្ចខិតខំ ប្រែងការពារប្រជាពលរដ្ឋ និងប្រឹងប្រែងអភិវឌ្ឍន៍ប្រទេសអោយកាន់តែរីកចម្រើនថែមទៀត៕