សម្តេចធិបតី៖ កម្ពុជា ក៏ដូចជាពិភពលោក កំពុងទទួលរងឥទ្ធិពលពីជម្លោះភូមិសាស្ត្រនយោបាយ ការប្រជែងរបស់មហាអំណាច ការប្រែប្រួលអាកាសធាតុ និងបញ្ហាផ្សេងៗទៀត
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា កម្ពុជាក៏ដូចជាប្រទេសនានានៅលើពិភពលោក បាននិងកំពុងទទួលរងឥទ្ធិពលពីជម្លោះភូមិសាស្ត្រនយោបាយ ការប្រជែងឥទ្ធិពលរបស់មហាអំណាច ការប្រែប្រួលអាកាសធាតុ ជំងឺឆ្លង និងបញ្ហាផ្សេងៗជាច្រើន ។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃទី៦ ខែកុម្ភៈ ឆ្នាំ២០២៤នេះ
សម្ដេចធិបតីលើកឡើងថា ទាំងនេះគឺសុទ្ធតែជាបញ្ហា និងជាក្តីកង្វល់ របស់យើងដែលរាជរដ្ឋាភិបាលត្រូវយកចិត្តទុកដាក់ និងដោះស្រាយដើម្បីលើកស្ទួយជីវភាព និងសុខុមាលភាពរបស់ប្រជាជន សំដៅសម្រេចបាននូវចក្ខុវិស័យរបស់សម្តេចតេជោ ហ៊ុន សែន ក្នុងការប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់ នៅឆ្នាំ២០៥០។
សម្តេចធិបតីនាយករដ្ឋមន្ត្រីបានបន្តថា ជាមួយចក្ខុវិស័យដែលជាក្តីស្រមៃរបស់ប្រជាជនកម្ពុជាគ្រប់រូប រាជរដ្ឋាភិបាលនីតិកាលទី៧ និងបន្តបន្ទាប់នៃរដ្ឋសភា ក្រោមការដឹកនាំរបស់គណបក្សប្រជាជនកម្ពុជា ប្តេជ្ញាបន្តអភិវឌ្ឍន៍ប្រព័ន្ធគាំព៌ាសង្គមនៅព្រះរាជាណាចក្រកម្ពុជាឱ្យមានលក្ខណៈប្រមូលផ្តុំ, សង្គតិភាព, ប្រសិទ្ធភាព, សមធម៌ និងចីភាព ដោយឈរលើស្មារតីមិនបោះបង់ពលរដ្ឋណាម្នាក់ តាមរយៈការផ្តោតកិច្ចអន្តរាគមន៍របស់រាជរដ្ឋាភិបាលលើគ្រួសារក្រីក្រ, ក្រុមជនងាយរងគ្រោះ និងគ្រួសារងាយរងហានិភ័យ។
សម្ដេចធិបតីបានថ្លែងបន្ថែមថា គោលនយោបាយរបស់រាជរដ្ឋាភិបាលនៅគ្រប់អាណត្តិទាំងអស់ គឺធ្វើយ៉ាងណាឱ្យប្រទេសយើងបានរីកចម្រើនតាមរយៈការធ្វើឱ្យប្រជាពលរដ្ឋរបស់យើងមានភាពរីកចម្រើន កាត់បន្ថយភាពក្រីក្រ និងលើកកម្ពស់ជីវភាពរបស់យើង។ សម្ដេចធិបតីនាយករដ្ឋមន្រ្ដីបានឱ្យដឹងទៀតថា ការដាក់ចេញនូវនយោបាយ ឈ្នះ ឈ្នះ ដើម្បីបញ្ចប់សង្គ្រាមទទួលបាននូវសន្តិភាព និងការឯកភាពជាតិពេញលេញគឺជាការបង្កើតនូវបរិស្ថានចាំបាច់ ដែលអាចឱ្យយើងអនុវត្តន៍ដោយជោគជ័យនូវយុទ្ធសាស្ត្រត្រីកោណ និងយុទ្ធសាស្ត្របញ្ចកោណកន្លងទៅ ដោយភាពក្រីក្រនៃប្រជាជនរបស់យើងត្រូវបានកាត់បន្ថយពីជាង ៥០% នៅឆ្នាំ១៩៩៧ មកត្រឹម ១៧% នៅឆ្នាំនេះ ដែលកើនបន្តិចនៅមុនកូវីដ-១៩ យើងមានទាបជាងនេះ។
សម្ដេចធិបតីបានអះអាងថា កំណើនសេដ្ឋកិច្ចរបស់យើងមានប្រមាណ ៧% តាំងពីពេលដែលយើងទទួលបានសន្តិភាពរហូតមកទល់ពេលផ្ទុះនូវជំងឺកូវីដ-១៩ បានន័យថា ជីវភាពរបស់យើងមានការរីកចម្រើន អ្នកដែលធ្លាប់នៅក្រោមបន្ទាត់នៃភាពក្រីក្របានក្លាយជាអ្នកដែលមានជីវភាពមធ្យម និងអ្នកដែលមានជីវភាពមធ្យមជាច្រើនបានវិវត្តន៍ទៅជាអ្នកមានជីវភាពខ្ពស់នៅក្នុងរយៈពេល ២០ឆ្នាំក្រោយពីការបិទបញ្ចប់សង្គ្រាមនៅកម្ពុជា។ តែផ្ទុយទៅវិញវាជាការគួរឱ្យសោកស្តាយខ្លាំងណាស់ដែលជំងឺកូវីដ-១៩ បានចូលមកដល់ ប្រសិនបើគ្មានវាទេនោះមិនដឹងថាប្រទេសរបស់យើងឈានដល់ណាទៅហើយនោះទេ៕
