សម្តេចធិបតី៖ រាជរដ្ឋាភិបាលអាណត្តិថ្មី បានដាក់ចេញកម្មវិធីគោលនយោបាយជាអាទិភាពចំនួន៦ ដើម្បីប្រព័ន្ធគាំពារសង្គមកាន់តែរីកចម្រើន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលនៅអាណត្តិទី៧នេះ បានត្រៀមរៀបចំថវិកាប្រមាណជិត ៤៥០លានដុល្លារ ដើម្បីអនុវត្តកម្មវិធីគោលនយោបាយជាអាទិភាពចំនួន៦ ក្នុងគោលដៅលើកកម្ពស់ប្រព័ន្ធគាំពារសង្គមឱ្យកាន់តែរីកចម្រើនថែមទៀត។
សម្តេចធិបតី ហ៊ុន ម៉ាណែត បានថ្លែងដូច្នេះ ក្នុងឱកាសដែលសម្តេចបានអញ្ជើញជាអធិបតីពិធីបិទសន្និបាតបូកសរុបការងារក្រសួងសង្គមកិច្ច អតីតយុទ្ធជន និងយុវនីតិសម្បទា និងលើកទិសដៅឆ្នាំ២០២៤ នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃទី៦ ខែកុម្ភៈ ឆ្នាំ២០២៤។
គួរបញ្ជាក់ថា កម្មវិធីគោលនយោបាយជាអាទិភាពចំនួន ៦ នោះរួមមាន៖
១.ការផ្ដល់ការថែទាំសុខភាពឆ្ពោះទៅរកកម្មវិធីគ្របដណ្តប់សុខភាពជាសកល ពោលគឺឱ្យដល់ ៩លាននាក់ តាមរយៈ ប.ស.ស.។
២.កម្មវិធីបណ្តុះបណ្តាលវិជ្ជាជីវៈ និងជំនាញបច្ចេកទេសដល់យុវជន មកពីគ្រួសារក្រីក្រ និងងាយរងគ្រោះ។
៣.កម្មវិធីស្ថាបនូបនីយកម្មជំនួយជាតិ ដែលត្រូវរៀបចំឱ្យមាននិរន្តរភាពកម្មវិធី មិនមែនឱ្យមនុស្សពឹងផ្អែកនោះទេ។
៤.កម្មវិធីជំរុញសេដ្ឋកិច្ចក្រៅប្រព័ន្ធ។
៥.យន្តការសម្របសម្រួលកម្មវិធីហិរញ្ញប្បទាន សំដៅលើកស្ទួយផលិតផលទីផ្សារ រក្សាលំនឹងកសិផលផ្សេងៗ។
៦.កម្មវិធីដាក់ពង្រាយមន្ត្រីជំនាញបច្ចេកទេសទៅតាមបណ្តាមូលដ្ឋានដើម្បីជួយបង្ហាត់បង្រៀនដល់ប្រជាកសិករ ៕
