អភិបាលខេត្តស្ទឹងត្រែង ស្នើដល់អាជ្ញាធរពាក់ព័ន្ធត្រូវចាត់វិធានការយ៉ាងម៉ឺងម៉ាត់បំផុត ដើម្បីទប់ស្កាត់ និងបង្ក្រាបរាល់សកម្មភាពបទល្មើសព្រៃឈើ
ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង និងក្នុងនាមគណៈកម្មការដើម្បីទប់ស្កាត់ និងបង្ក្រាបបទល្មើសធនធានធម្មជាតិថ្នាក់ខេត្ត បានស្នើដល់មន្ទីរ-អង្គភាព អាជ្ញាធរមូលដ្ឋានគ្រប់លំដាប់ថ្នាក់ និងអាជ្ញាធរមាន សមត្ថកិច្ចពាក់ព័ន្ធ ត្រូវចាត់វិធានការយ៉ាងម៉ឺងម៉ាត់បំផុត ដើម្បីទប់ស្កាត់ និងបង្ក្រាបរាល់សកម្មភាពបទល្មើសការកាប់រាន ដុត ឈូសឆាយ និងហ៊ុមព័ទ្ធដ៏ព្រៃឈើ ដីព្រៃលិចទឹក និងដីតំបន់ការពារធម្មជាតិ។
តាមរយៈសេចក្តីជូនដំណឹងស្តីពី វិធានការទប់ស្កាត់ និងបង្ក្រាបការកាប់រាន ដុត ឈូសឆាយ និងហ៊ុមព័ទ្ធដ៏ព្រៃឈើ ដីព្រៃលិចទឹក និងដីតំបន់ការពារធម្មជាតិ ដើម្បីវាតយកដីធ្វើជាកម្មសិទ្ធិ នៅក្នុងភូមិសាស្ត្រខេត្តស្ទឹងត្រែង នៅថ្ងៃទី៥ ខែកុម្ភៈ ឆ្មាំ២០២៤ ឯកឧត្ដម ស្វាយ សំអ៊ាង បានបញ្ជាក់ថា អ្នកដែលបានទន្ទ្រានកាន់កាប់ដីខុសច្បាប់កន្លងមក ត្រូវរុះរើខ្ទម រោង តង់ និងសំណងអនាធិបតេយ្យ ហើយប្រគល់ដី និងទីតាំងមកឱ្យក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទវិញដោយស្ម័គ្រចិត្ត និងឥតលក្ខខណ្ឌ។
ឯកឧត្ដមបន្តថា ទន្ទឹមនិងនោះ មន្ទីរបរិស្ថានខេត្ត និងមន្ទីរកសិកម្ម រុក្ខា ប្រមាញ់ និងនេសាទខេត្ត ត្រូវដឹកនាំមន្ត្រីឧទ្យានុរក្ស មន្ត្រីរដ្ឋបាលព្រៃឈើ-ជលផល ដោយសហការជាមួយមន្ទីរ-អង្គភាព អាជ្ញាធរមូលដ្ឋាន និងអាជ្ញាធរមានសមត្ថកិច្ចពាក់ព័ន្ធ ធ្វើការអប់រំផ្សព្វផ្សាយច្បាប់ លិខិតបទដ្ឋានគតិយុត្តនានាពាក់ព័ន្ធនឹងការគ្រប់គ្រង តំបន់ការពារធម្មជាតិ តំបន់ដីព្រៃឈើ តំបន់ព្រៃលិចទឹក និងតំបន់សហគមន៍ព្រៃឈើ ដល់មហាជនទូទៅ ជាពិសេសប្រជាសហគមន៍មូលដ្ឋាន។
ជាមួយគ្នានោះឯកឧត្ដមអភិបាលខេត្ត បានណែនាំដល់មន្ទីរបរិស្ថានខេត្ត និងមន្ទីរកសិកម្ម រុក្ខាប្រមាញ់ និងនេសាទខេត្ត ត្រូវបន្តចាត់វិធានការទប់ស្កាត់ និង បង្ក្រាបការកាប់ទន្ទ្រានដីព្រៃឈើរបស់រដ្ឋ និងដីតំបន់ការពារធម្មជាតិ ដើម្បីវាតយកដីធ្វើជាកម្មសិទ្ធិ និងបញ្ឈប់បញ្ជាក់លើឯកសារកាន់កាប់ដីព្រៃឈើរបស់រដ្ឋ និងដីតំបន់ការពារធម្មជាតិជូនប្រជាពលរដ្ឋ ដើម្បីស្នើសុំធ្វើការកាន់កាប់ជាកម្មសិទ្ធិ៕
