ឧត្ដមសេនីយ៍ត្រី អ៊ុំ សុភា នាំយកថវិកាគោលនយោបាយរបស់សម្តេចតេជោ និងអំណោយសម្តេចធិបតី ឧបត្ថម្ភដល់យោធិននារីលំហែមាតុភាព
ភ្នំពេញ៖ ឯកឧត្តម ឧត្ដមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃទី៦ ខែកុម្ភៈ ឆ្នាំ២០២៤ បានដឹកនាំក្រុមការងារ អញ្ជើញនាំយកថវិកាគោលនយោបាយរបស់សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ឧបត្ថម្ភចំពោះយោធិននារីលំហែមាតុភាព ចំនួន ៨០០,០០០រៀល រួមនឹងអង្ករ គ្រឿងឧបភោគបរិភោគមួយចំនួន ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី ហ៊ុន ម៉ាណែត ឧបត្ថម្ភដល់លោកស្រី ពលបាលឯក កង សុថារី យោធិននារីបម្រើការងារនៅផ្នែកសឹករងក្រុងកំពង់ឆ្នាំង ដែលបានលំហែមាតុភាព(សម្រាលកូន) កន្លងទៅថ្មីៗនេះ ។
ស្ថិតក្នុងឱកាសនេះ ឯកឧត្តម មេបញ្ជាការ បានពាំនាំប្រសាសន៍ សួរសុខទុក្ខ និងអបអរសាទរ ពីសំណាក់សម្តេចតេជោ សម្តចធិបតី និង លោកជំទាវ ជូនចំពោះគ្រួសារលោកស្រី ពលបាលឯក កង សុថារី ដែលទទួលបានសមាជិកថ្មីក្នុងគ្រួសារបន្ថែមទៀត ។
ឯកឧត្តម មេបញ្ជាការ បានបន្តថា រាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តែងតែយកចិត្តទុកដាក់គិតគូរជានិច្ចពីសុខុមាលភាពរបស់កងទ័ព និង គ្រួសារកងទ័ព តួយ៉ាងដូចជាការឧបត្ថម្ភថវិកាជូនយោធិននារីលំហែមាតុភាពនាពេលនេះ ។
ចុងបញ្ចប់ លោកស្រី ពលបាលឯក កង សុថារី និងក្រុមគ្រួសារ បានគោរពថ្លែងអំណរគុណយ៉ាងជ្រាលជ្រៅបំផុតជូនចំពោះសម្តេចតេជោ សម្តេចធិបតីនាយករដ្ឋមន្ត្រី និងលោកជំទាវ ព្រមទាំង ឯកឧត្តម មេបញ្ជាការ តំបន់ប្រតិបត្តិការសឹករងកំពង់ឆ្នាំង និងក្រុមការងារ ដែលបានឆ្លៀតឱកាសអញ្ជើញជួបសួរសុខទុក្ខ និងនាំយកថវិការបស់រាជរដ្ឋាភិបាល មកផ្ដល់ជូនពួកគាត់សម្រាប់ដោះស្រាយការលំបាកនាពេលនេះ ៕
