សម្តេចធិបតី ហ៊ុន ម៉ាណែត ជាអ្នកបើកទំព័រប្រវត្តិសាស្ត្រថ្មី នៃទំនាក់ទំនងកម្ពុជា-ថៃ

ភ្នំពេញ៖ រាជរដ្ឋាភិបាលនីតិកាលថ្មី ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាអ្នកបើកទំព័រថ្មីនៃប្រវត្តិទំនាក់ទំនងរវាងប្រទេសកម្ពុជា និងប្រទេសថៃ ហើយបច្ចុប្បន្នទំនាក់ទំនងនេះប្រៀបដូចជារាត្រីទឹកឃ្មុំ។ នេះបើយោងតាមការបញ្ជាក់ពីឯកឧត្ដម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការការបរទេស និងសហប្រតិបត្តិការអន្តរជាតិ ។

ឯកឧត្ដម តាន់ ហ្សង់ហ្វ្រង់ស័រ នៅយប់ថ្ងៃទី០៧ ខែកុម្ភៈ ឆ្នាំ២០២៤នេះ នៅក្នុងសន្និសីទសារព័ត៌មាន ក្រោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុនី ហ៊ុនម៉ាណែត បានបញ្ចប់ដំណើរទស្សនកិច្ចផ្លូវការនៅទីក្រុងបាំងកក ប្រទេសថៃបានបន្ថែមថា ឆន្ទះមុះមុតរបស់ប្រទេសកម្ពុជា-ថៃ នេះ បានស្តែងឡើងតាមរយៈជម្រើសរបស់នាយករដ្ឋមន្ត្រីថៃ ដែលបានជ្រើសរើសប្រទេសកម្ពុជា ជាគោលដៅទស្សនៈកិច្ចលើកទី១បង្អស់របស់លោកនៅក្រៅប្រទេស ក្នុងនាមជានាយករដ្ឋមន្ត្រីថៃ ហើយឆន្ទះដ៏មុះមុតនោះបានស្តែងឡើងតាមរយៈទស្សនៈកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅក្នុងទីក្រុងបាំងកក។

ឯកឧត្ដម តាន់ ហ្សង់ហ្វ្រង់ស័រ បានបញ្ជាក់ទៀតថា ទាំងនេះហើយសុទ្ធសឹងតែជាលទ្ធផល និងភស្តុតាងដែលឱ្យយើងបានពិនិត្យមើលឃើញថា លទ្ធផលដែលកម្ពុជាសម្រេចបានគឺល្អហួសការស្មាន និងជាសក្ខីកម្មដែលបង្ហាញបានថា ទំនាក់ទំនងកម្ពុជា-ថៃ នាពេលបច្ចុប្បន្ននេះបានស្ថិតក្នុងស្ថានភាពនៃរាត្រីទឹកឃ្មុំ៕