ប្រមុខរាជរដ្ឋាភិបាល៖ រដ្ឋ មិនអាចចិញ្ចឹមពលរដ្ឋទាំងអស់បានទេ ប៉ុន្តែរដ្ឋមានលទ្ធភាព បង្កលក្ខណៈឱ្យពលរដ្ឋ អាចរស់ខ្លួនឯង ហើយជួយរដ្ឋវិញ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត​ នាយករដ្ឋមន្ដ្រីនៃកម្ពុជា បានលើកឡើងថា រាជរដ្ឋាភិបាលកម្ពុជា មិនអាចចិញ្ចឹមប្រជាពលរដ្ឋទាំងអស់នោះទេ ប៉ុន្ដែរាជរដ្ឋាភិបាល មានលទ្ធភាពដើម្បីបង្កលក្ខណៈងាយស្រួលឱ្យប្រជាពលរដ្ឋ អាចរស់ខ្លួនឯង ហើយជួយរដ្ឋវិញ ។

ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងការងារ និងបណ្តុះបណ្តាលវិជ្ជាជីវៈ នាថ្ងៃទី៨ ខែកុម្ភៈ ឆ្នាំ២០២៤ សម្ដេចធិបតី ហ៊ុន ម៉ាណែត​ បញ្ជាក់ដូច្នេះថា «រដ្ឋមិនអាចចិញ្ចឹមប្រជាពលរដ្ឋទាំងអស់បានទេ រដ្ឋមិនអាចរកត្រីជូនប្រជាពលរដ្ឋនោះទេ រដ្ឋមានតែលទ្ធភាពដើម្បីបង្កលក្ខណៈឱ្យប្រជាពលរដ្ឋ ដែលច្រើនបំផុត អាចមានលទ្ធភាពរស់ខ្លួនឯង ពង្រឹងខ្លួនឯង ហើយចិញ្ចឹមរដ្ឋវិញ ជួយរដ្ឋវិញ ដើម្បីជួយទំនុកបម្រុងអ្នកផ្សេង»។

សម្តេចធិបតីគូសបញ្ជាក់ថា ការចូលរួមពីវិស័យឯកជនបានដើរតួនាទី យ៉ាងសំខាន់ក្នុងការបង្កើតការងារជូនដល់ប្រជាពលរដ្ឋ ខណៈរាជរដ្ឋាភិបាល ដឹកនាំដោយគណបក្សប្រជាជនកម្ពុជាទាំងបច្ចុប្បន្ន និងអនាគតបាននិងកំពុងបន្តផ្តល់អាទិភាពខ្ពស់ចំពោះការអភិវឌ្ឍវិស័យការងារ និងសន្តិសុខសង្គម ពោលគឺ ប្រជាជនម្នាក់គឺមានអាជីពមួយ ៕