កម្ពុជាកោតសរសើររុស្ស៊ី ដែលជាប្រទេសមួយក្នុងចំណោមប្រទេសមួយចំនួនតូច ប្រារព្ធទិវាអ្នកការទូត

ភ្នំពេញ៖ នៅថ្ងៃទី០៨ ខែកុម្ភៈ ឆ្នាំ២០២៤ ឯកឧត្តមបណ្ឌិត ចែម វីឌ្យ៉ា រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ បានអញ្ជើញជាតំណាងរបស់ ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ចូលរួមជាភ្ញៀវកិត្តិយស ក្នុងកម្មវិធីជប់លៀង រៀបចំឡើងដោយ ឯកឧត្តម អាណាតូលី បូរូវីក ឯកអគ្គរដ្ឋទូតវិសាមញ្ញ និងពេញសមត្ថភាពនៃសហព័ន្ធរុស្សី ក្នុងឱកាសទិវាអ្នកការទូត។

ឯកឧត្តមបណ្ឌិត ចែម វីឌ្យ៉ា បានថ្លែងសុន្ទរកថាអបអរសាទរ និងកោតសរសើរ ដោយទទួលស្គាល់តួនាទីដ៏សំខាន់របស់អ្នកការទូត ដែលបានតស៊ូដើម្បីសន្តិភាព និងសន្តិសុខ ក្នុងពិភពលោក ឱ្យទទួលបានវិបុលសុខរួម។

ឯកឧត្តមបណ្ឌិត បានកោតសរសើររុស្ស៊ី ដែលជាប្រទេសមួយក្នុងចំណោមប្រទេសមួយចំនួនតូចប៉ុណ្ណោះ ដែលប្រារព្ធទិវាអ្នកការទូតនេះ ហើយជាប្រទេស ដែលសម្បូណ៌ទៅដោយវប្បធម៌ថ្កុំថ្កើង និងប្រពៃណីយូរអង្វែង ដែលមានអ្នកការទូត ប្រកបដោយវិជ្ជាជីវៈដ៏ល្អប្រពៃ៕