ឯកឧត្ដម ស្វាយ សំអ៊ាង ក្រើនរំលឹកដល់អង្គបោះឆ្នោតត្រូវត្រៀមឯកសារឲ្យបានគ្រប់និងរួចរាល់សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥

ភ្នំពេញ៖ ឯកឧត្ដម ស្វាយ សំអ៊ាង សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សប្រជាជនកម្ពុជាខេត្តស្ទឹងត្រែង បានក្រើនរំលឹកដល់អង្គបោះឆ្នោតត្រូវត្រៀមឯកសារឲ្យបានគ្រប់និងរួចរាល់សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤។

នៅព្រឹកថ្ងៃទី១០ ខែកុម្ភៈ ឆ្នាំ២០២៤ គណបក្សប្រជាជនកម្ពុជាខេត្តស្ទឹងត្រែង បានរៀបចំពិធីបើកយុទ្ធនាការឃោសនាបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ក្រោមអធិបតីភាពឯកឧត្ដម ឡូយ សុផាត សមាជិកគណៈកម្មាធិការកណ្តាល និងជាប្រធានក្រុមការងារចុះមូលដ្ឋានខេត្តស្ទឹងត្រែង ។

ពិធីនេះក៏មានការអញ្ជើញចូលរួមជាគណៈអធិបតី ពីឯកឧត្ដម ផៃ ប៊ុនឈឿន សមាជិកគណៈកម្មាធិការកណ្តាល និងជាអនុប្រធានក្រុមការងារចុះមូលដ្ឋានខេត្តស្ទឹងត្រែង និងឯកឧត្តម លោកជំទាវ សមាជិកាព្រឹទ្ធសភា រដ្ឋសភា និងបេក្ខជនឈរឈ្មោះបោះឆ្នោតជ្រើសតាំងរដ្ឋសភា ក្រុមការងារចុះជួយក្រុង ស្រុក មេឃុំ ចៅសង្កាត់ និងសមាជិកឃុំក្រុមប្រឹក្សាឃុំសង្កាត់ មេភូមិផងដែរ។

មានប្រសាសន័នៅក្នុងកម្មវិធីឯកឧត្ដម ស្វាយ សំអ៊ាង ប្រធានគណៈកម្មាធិការគណបក្សខេត្ត បានមានប្រសាសន៍ក្រើនរំលឹកដល់អង្គបោះឆ្នោតលើការងារសំខាន់ៗមួយចំនួន រួមមាន៖

១-ត្រួតពិនិត្យឡើងវិញចំពោះឯកសារសម្រាប់ការបោះឆ្នោតដែលមានអត្តសញ្ញាណប័ណ្ណសញ្ជាតិខ្មែរ ឬឯកសារផ្សេងទៀតដែលច្បាប់ និងបទបញ្ជានីតិវិធីកំណត់ និងអនុញ្ញាតឱ្យប្រើប្រាស់បានសម្រាប់បោះឆ្នោត។

២-ត្រៀមឱ្យបានរួចរាល់ពីចម្ងាយនូវការពិនិត្យ ថែរក្សាសុខភាព និងការងារប្រតិបត្តិការ មធ្យោបាយដឹកជញ្ជូនអង្គបោះឆ្នោតពីមូលដ្ឋានទាំងទៅទាំងមក ចូលរួមការបោះឆ្នោត។

៣-ពិនិត្យ គិតគូរគ្រប់ជ្រុងជ្រោយ និងធ្វើបុរេសកម្មលើទិដ្ឋភាពផ្នែកច្បាប់ នីតិវិធី និងក្របខ័ណ្ឌសភាពការណ៍សំខាន់ៗមួយចំនួន ដើម្បីអាចប្រតិកម្ម ឆ្លើយតប និងដោះស្រាយបានទាន់ពេលវេលា៕