នាយករដ្ឋមន្ត្រីអ៊ីស្រាអែល បញ្ជាឱ្យយោធាជម្លៀសជនស៊ីវិលចេញពីទីក្រុង Rafah មុនពេលមានការវាយប្រហារទ្រង់ទ្រាយធំចាប់ផ្តើម

បរទេស៖ នាយករដ្ឋមន្ត្រីអ៊ីស្រាអែល លោក Benjamin Netanyahu បានឲ្យដឹងកាលពីថ្ងៃសុក្រថា លោកបានបញ្ជាឱ្យយោធារបស់លោករៀបចំផែនការជម្លៀសជនស៊ីវិលចេញពីទីក្រុង Rafah ភាគខាងត្បូង Gaza Strip មុនពេលការវាយប្រហារទ្រង់ទ្រាយធំបានចាប់ផ្តើម។

លោកបានឲ្យដឹងនៅក្នុងសេចក្តីថ្លែងការណ៍មួយថា វាមិនអាចទៅរួចទេក្នុងការសម្រេចបាននូវគោលដៅនៃសង្រ្គាមកម្ចាត់ក្រុមហាម៉ាសដោយទុកកងវរសេនាតូចហាម៉ាស់ចំនួនបួននៅក្នុងទីក្រុង Rafah។

លោកនាយករដ្ឋមន្ត្រី បានស្នើឱ្យកងកម្លាំងការពារអ៊ីស្រាអែលដាក់ផែនការទៅគណៈរដ្ឋមន្ត្រីរបស់គាត់សម្រាប់ការជម្លៀសជនស៊ីវិលនិងបំផ្លាញកងវរសេនាតូច។

លោក Netanyahu បានឲ្យដឹងនៅសប្តាហ៍នេះថា ទីក្រុង Rafah និងទីក្រុង Khan Younis គឺជាបន្ទាយចុងក្រោយពីររបស់ក្រុម Hamas។ សូមបញ្ជាក់ថា ក្រុមហាម៉ាស គឺជាក្រុមភេរវករដែលកំណត់ដោយសហរដ្ឋអាមេរិក។

ទីក្រុង Rafah មានព្រំប្រទល់ជាប់ប្រទេសអេហ្ស៊ីប ហើយមន្ត្រីនៅទីនោះបានព្រមានថា ប្រតិបត្តិការជើងគោកណាមួយនៅក្នុងតំបន់ ឬការផ្លាស់ទីលំនៅដ៏ធំឆ្លងកាត់ព្រំដែននឹងធ្វើឱ្យខូចដល់សន្ធិសញ្ញាសន្តិភាពរយៈពេល ៤០ ឆ្នាំរបស់ខ្លួនជាមួយអ៊ីស្រាអែល។

ទីក្រុង Rafah ក៏ជាច្រកចូលមនុស្សធម៌ដ៏សំខាន់ទៅកាន់តំបន់ហ្គាហ្សាផងដែរ។ ការប្រយុទ្ធគ្នាខ្លាំងអាចរារាំងដល់កិច្ចខិតខំប្រឹងប្រែងសង្គ្រោះបន្ថែមទៀត។

អ៊ីស្រាអែលបានបើកការវាយប្រហារថ្មីមួយយប់ក្នុងទីក្រុង Rafah ដែលសាក្សីនិងមន្ត្រីមន្ទីរពេទ្យបានឲ្យដឹងថាបានសម្លាប់មនុស្សយ៉ាងហោចណាស់ ៨ នាក់ រួមទាំងស្ត្រី និងកុមារ។

ប្រភព៖ VOA

ប្រែសម្រួលដោយ៖ ឡាយ លីហួ