រដ្ឋមន្រ្តីបរិស្ថាន ដឹកនាំប្រតិភូ ចូលរួមគោរពវិញ្ញាណក័ន្ខសពមាតាបង្កើតរបស់ឯកឧត្តមទេសរដ្ឋមន្ត្រី ហូ សិទ្ធី

ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានអញ្ជើញដឹកនាំប្រតិភូថ្នាក់ដឹកនាំនិងមន្រ្តីរាជការក្រសួងបរិស្ថាន ចូលរួមគោរពវិញ្ញាណក័ន្ខសពមាតាបង្កើតរបស់ ឯកឧត្តមទេសរដ្ឋមន្ត្រី ហូ សិទ្ធី នាយកខុទ្ធកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នារសៀលថ្ងៃអាទិត្យ ២កើត ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១១ ខែកុម្ភៈ ឆ្នាំ២០២៤។

នៅក្នុងឱកាសដ៏សែនក្រៀមក្រំនេះ និងក្តុកក្តួលជាទីបំផុត ឯកឧត្តមរដ្ឋមន្រ្តី ចូលរួមរំលែកនូវមរណទុក្ខ ដោយសេចក្តីសោកស្ដាយ ស្រណោះអាឡោះអាល័យ យ៉ាងក្រៃលែង ជាមួយឯកឧត្តមទេសរដ្ឋមន្រ្តី ព្រមទាំងក្រុមគ្រួសារ ចំពោះការបាត់បង់ មហាឧបាសិកាពុទ្ធសាសនូបត្ថម្ភក៍ មុជ សុក្ខុន ជាមាតាបង្កើត មាតាក្មេក និងជាជីដូន ជាទីគោរពស្រឡាញ់ ប្រកបដោយព្រហ្មវិហារធម៌ដ៏ខ្ពង់ខ្ពស់ និងដ៏ជ្រាលជ្រៅបំផុត ដែលបានអប់រំ ផ្តល់ដំបូន្មាន ធ្វើឱ្យកូនៗ និងចៅៗ ក្លាយជាបញ្ញវន្ត និងជាថ្នាក់ដឹកនាំ ដែលមានស្នាដៃក្នុងការអភិវឌ្ឍសង្គមជាតិ ព្រមទាំងរួមចំណែកកសាងសមិទ្ធផលជាច្រើន ក្នុងការលើកស្ទួយព្រះពុទ្ធសាសនានៅព្រះរាជាណាចក្រកម្ពុជា។

ឯកឧត្តមបណ្ឌិត អ៊ាង សុផល្លែត និងគណៈប្រតិភូ សូមឧទ្ទិសបួងសួងដល់ដួងវិញ្ញាណក្ខន្ធសព មហាឧបាសិកាពុទ្ធសាសនូបត្ថម្ភក៍ មុជ សុក្ខុន សូមបានទៅកាន់សុគតិភព កុំបីឃ្លៀងឃ្លាតឡើយ ៕