រដ្ឋលេខាធិការក្រសួងធនធានទឹក ដឹកនាំកិច្ចប្រជុំតាមប្រព័ន្ធវីដេអូ ស្តីពីការត្រួតពិនិត្យវឌ្ឍនភាពគម្រោង CAISAR

ភ្នំពេញ៖ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំការប្រជុំតាមប្រព័ន្ធវីដេអូជាមួយធនាគារវិនិយោគហេដ្ឋារចនាសម្ព័ន្ធអាស៊ី (AIIB) មកពីទីស្នាក់ការកណ្តាលក្នុងទីក្រុង Abu Dhabi ប្រទេសអារ៉ាប់ ជាមួយសហហិរញ្ញប្បទានមូលនិធិអន្តរជាតិដើម្បីការអភិវឌ្ឍវិស័យកសិកម្ម(IFAD) និងសហហិរញ្ញប្បទានមូលនិធិបៃតងពិភពលោក(GCF) មកពីស្នាក់ការកណ្តាលប្រចាំទីក្រុងសេអ៊ូល ប្រទេសកូរ៉េខាងត្បូង ស្តីពីការត្រួតពិនិត្យលើវឌ្ឍនភាពគម្រោងធារាសាស្រ្តធន់អាកាសធាតុ និងកសិកម្មដែលមានភាពធន់ និងមាននិរន្តរភាព (CAISAR)។

ឯកឧត្តមរដ្ឋលេខាធិការ មានប្រសាសន៍ថា កិច្ចប្រជុំក៏បានពិភាក្សាពីការរៀបចំទទួលគណៈប្រតិភូចុះធ្វើការត្រួតពិនិត្យគម្រោង CAISAR មកពីស្ថាប័នទាំងបី AIIB, IFAD និងGCF ដែលនឹងចុះមកធ្វើការវាយតម្លៃលើលទ្ធផលការងាររបស់គម្រោងចាប់ពីថ្ងៃទី១៤ ខែកុម្ភៈ ឆ្នាំ២០២៤ នេះតទៅ ក្នុងគោលបំណងធ្វើឱ្យគម្រោងខ្នាតធំ CAISAR ទទួលបាននូវការគាំទ្រលើការបំពេញបេសកកម្មដ៏មមាញឹកជាអតិបរមា ព្រមទាំងសម្រេចឱ្យបាននូវទស្សនាទាននៃការគ្រប់គ្រងវិស័យធនធានទឹក និងឧតុនិយម បញ្ជាទឹក និងប្រើប្រាស់ទឹកឱ្យមានប្រសិទ្ធភាពខ្ពស់ ប្រកបដោយនិរន្តរភាពក្នុងរយៈពេលខ្លី មធ្យម និងយូរអង្វែង ៕