អភិបាលខេត្តកំពង់ធំ៖ វិស័យអប់រំ មានសារៈសំខាន់ជាងគេ ក្នុងការអភិវឌ្ឍធនធានមនុស្ស
ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ និងលោក ជា សតិភន្ទ អគ្គនាយករងរដ្ឋាករទឹកស្វ័យយ័ត្នភ្នំពេញ ប្រធានមន្ទីរជុំវិញខេត្ត មន្ត្រីរាជការ លោកគ្រូ អ្នកគ្រូ និងសិស្សានុសិស្សជាច្រើននាក់ បានអញ្ជើញចូលរួមក្នុងពិធីបញ្ចុះបឋមសិលាសាងសង់អគារសិក្សា ១ខ្នង ៣បន្ទប់ នៅសាលាបឋមសិក្សារកា ស្ថិតនៅភូមិរកា សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ នៅព្រឹកថ្ងៃទី១៥ ខែកុម្ភៈ ឆ្នាំ២០២៤។
ថ្លែងនៅក្នុងកម្មវិធីនេះឯកឧត្តម ងួន រតនៈ បានចូលរួមសប្បាយរីករាយជាមួយលោកគ្រូ អ្នកគ្រូ សិក្សានុសិស្ស និងមាតាបិតា អាណាព្យបាលសិស្សទាំងអស់ ដែលបានបើកការដ្ឋានសាងសង់បញ្ចុះបឋមសិលាអគារសិក្សានេពេលនេះ ក្រោមការឧបត្ថម្ភពីអង្គភាពរដ្ឋករទឹកស្វ័យយ័ត្នរាធានីភ្នំពេញ។
ជាមួយគ្នានោះដែរ ឯកឧត្តម ងួន រតនៈ ក៏បានលើកអំពីប្រវត្តខ្លះៗមុននឹងឈាន់ដល់ការសាងសង់អគារសិក្សានេះ ដោយកន្លងមក ឯកឧត្តមអភិបាលខេត្ត ក៏បានធ្លាប់មកជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្ស ហើយបានឃើញស្ថានភាពជាក់ស្តែងនូវអគារសិក្សា មានច្រើនបន្ទប់ ប៉ុន្តែមានលក្ខណៈចាស់ សភាពឌ្រុដទ្រោម និងមានសិស្សរៀន មួយបន្ទប់រហូតដល់ទៅ ៥០នាក់ថែមទៀតផង។ ហើយឯកឧត្តមក៏បានស្នើសុំស្បុរសជន ក៏ដូចជាអង្គភាពរដ្ឋករទឹកស្វ័យយ័ត្នរាធានីភ្នំពេញ ជួយឧត្ថម្ភសាងសងអគាសិក្សាមួយខ្នងនេះ។ ឯកឧត្តមបន្ថែមទៀតថា អង្គភាពរដ្ឋករទឹកស្វ័យយ័ត្នរាធានីភ្នំពេញ ការដែលជួយសាងសង់សាលារៀននេះ មិនមែនទើបតែជួយនៅក្នុងខេត្តកំពង់ធំនេះទេ គឺមានច្រើនកន្លែងផ្សេងទៀត។
លើសពីនេះទៀត ឯកឧត្តមអភិបាលខេត្ត បន្ថែមទៀតថា វិស័យអប់រំ ពិតជាមានសារៈសំខាន់ជាងគេ ក្នុងការអភិវឌ្ឍធនធានមនុស្សនេះ ដែលប្រមុខរាជរដ្ឋាភិបាលបានយកចិត្តទុកដាក់ណាស់ ធ្វើយ៉ាងណាអភិវឌ្ឍន៍ធនធានមនុស្សឲ្យទៅជាមូលធន ដែលជាទន់មួយសម្រាប់ចូលរួមការវិនិយោគប្រទេសជាតិ មានការអភិវឌ្ឍ។
ក្នុងឱកាសនេះ ឯកឧត្តម ងួន រតនៈ បានថ្លែងអំណរគុណដល់ថ្នាក់ដឹកនាំអង្គភាពរដ្ឋករទឹកស្វ័យយ័ត្នរាធានីភ្នំពេញដែលបានជួយសាងសង់អគារសិក្សានេះ និងបានជួយសម្រួលការលំបាករបស់សាលាបានមួយកម្រិត។
ឆ្លៀតនៅក្នុងឱកាសនេះឯកឧត្តម ងួន រតនៈ អភិបាលខេត្តក៏ បានផ្ដាំផ្ញើដល់អាជ្ញាធរមូលដ្ឋានចូលរួមទប់ស្កាត់ ចាត់វិធានការបង្ក្រាប ល្បែងស៊ីសងខុសច្បាប់គ្រប់ប្រភេទ និងការចូលទៅអាស្រ័យផលដីតំបន់៣ ក្រៅពីដីតំបន់ឆ្វៀល ក្នុងមូលដ្ឋានរបស់ខ្លួនឲ្យមានប្រសិទ្ធិភាព ៕
