សម្តេចធិបតី៖ ប្រទេសមួយមានធនធានមនុស្សច្រើន គឺបង្កើនភាពប្រកួតប្រជែង ជំរុញកំណើនសេដ្ឋកិច្ចជាតិ
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានលើកឡើងថា ប្រសិនបើប្រទេសមួយមានធនធានមនុស្សដែលមានសមត្ថភាពកាន់តែច្រើន នឹងជួយបង្កើនភាពប្រកួតប្រជែង និងជំរុញកំណើនសេដ្ឋកិច្ចជាតិ ខណៈដែលកម្ពុជាជាប្រទេសងើបចេញពីសង្គ្រាមរ៉ាំរ៉ៃ ប៉ុន្តែអាចប្រកួតប្រជែង និងទទួលបានជ័យលាភីជាបន្តបន្ទាប់ទាំងក្នុងតំបន់ និងពិភពលោក ការផ្ដល់ឱកាស និងដាក់ទិសដៅត្រូវ គោលនយោបាយត្រូវនោះយុវជនខ្មែរមានសមត្ថភាពប្រកួតប្រជែងអន្តរជាតិបាន។
ក្នុងឱកាសដែលសម្តេចបានអញ្ជើញជាអធិបតី ក្នុងពិធីសម្ពោធអគារសាកលវិទ្យាល័យជាតិគ្រប់គ្រង សាខាវាលស្បូវ និងប្រគល់សញ្ញាបត្រជូននិស្សិត ជាង ៥ពាន់នាក់ នៅថ្ងៃទី១៥ ខែកុម្ភៈ ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ថា «មនុស្សម្នាក់មានសមត្ថភាព មានគុណភាព មានគុណវុឌ្ឍិ និងចំណេះដឹង មានភាពបត់បែន មានភាពប្រកួតប្រជែង ប្រទេសដូចគ្នា បើសិនជាប្រទេសមួយមានធនធានមនុស្សច្រើន មានមូលធនមនុស្សកាន់តែច្រើន សុខភាព និងសមត្ថភាពរបស់ប្រជាពលរដ្ឋយើងកាន់តែច្រើន ទីមួយបង្កើនភាពប្រកួតប្រជែងរបស់យើង»។
សម្តេចធិបតីបន្តថា ប្រទេសកម្ពុជា ប្រកាន់របបទីផ្សារសេរី និងសមាហរណកម្មនៅក្នុងពិភពលោក យើងត្រូវមានការប្រកួតប្រជែង គឺគេមិនផ្តល់ឱ្យយើងដោយ Free Free នោះទេ។ ដូច្នេះដើម្បីប្រកួតប្រជែងបានដោយស្មើរភាពកម្ពុជា ត្រូវការធនធានមនុស្ស ដែលអាចជំរុញសេដ្ឋកិច្ចជាតិ និងការប្រកួតប្រជែងបាន។
សម្តេចធិបតី ហ៊ុន ម៉ាណែត បានរំលឹកថា ប្រទេសកម្ពុជា ទើបងើបចេញពីភ្លើងសង្គ្រាមស៉ីវិល ជាង២៥ឆ្នាំ បើក្រឡេកមើលពីទសវត្សរ៍៦០ និង៧០ កម្ពុជា ជាប្រទេសមួយដែលមានសេដ្ឋកិច្ចជឿនលឿន ជាប្រទេសមួយចំនួននៅក្នុងតំបន់ ប៉ុន្តែ ដោយសារតែកម្ពុជាបានជួបនូវវិបត្តិសង្គ្រាមស៉ីវិល ទើបធ្វើឱ្យដំណើរការអភិវឌ្ឍប្រទេសខកខាន។
សម្តេចធិបតី ហ៊ុន បានគូសបញ្ជាក់ថា «ខណៈកម្ពុជាជាប្រទេសងើបចេញពីសង្គ្រាមរ៉ាំរ៉ៃ ប៉ុន្តែអាចប្រកួតប្រជែង និងទទួលបានជ័យលាភីជាបន្តបន្ទាប់ទាំងក្នុងតំបន់ និងពិភពលោក។ ការផ្ដល់ឱកាស ហើយដាក់ទិសដៅត្រូវ គោលនយោបាយត្រូវ យើងនឹងមានសមត្ថភាពប្រកួតប្រជែងអន្តរជាតិបាន»។
សម្ដេចនាយករដ្ឋមន្ត្រី បានលើកឡើងថា កាលមុនកូវីដ១៩ គឺ២០ឆ្នាំក្រោយពីបញ្ចប់សង្គ្រាម សេដ្ឋកិច្ចកម្ពុជាបានស្ថិតក្នងចំណោមសេដ្ឋកិច្ចដើរលឿនជាងគេ ១០ប្រទេស នៅលើពិភពលោក ក្នុងកំណើនជាង ៧% ក្នុងមួយឆ្នាំ ដែលនេះជាឧទាហរណ៍ បង្ហាញថា កម្ពុជាអាចបិទគម្លាតសេដ្ឋកិច្ចជាមួយប្រទេសដទៃ ប្រសិនមានឱកាស ដែលឱកាសធំបំផុតរបស់កម្ពុជា គឺបានពីសុខសន្តិភាព ៕
