សម្តេចធិបតី៖ បើដាក់ទិសដៅត្រូវ គោលនយោបាយត្រូវ យើងនឹងមានសមត្ថភាពប្រកួតប្រជែង

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ប្រទេសកម្ពុជាជាប្រទេសដែលធ្លាប់ឆ្លងកាត់សង្រ្គាម ខណៈប្រទេសអាស៊ានផ្សេងទៀត មិនឆ្លងកាត់សង្រ្គាមដូចយើងទេ ប៉ុន្តែកម្ពុជានៅតែមានឱកាស ព្រោះដោយសារសុខសន្តិភាព ស្ថិរភាព ហើយកម្ពុជាក៏អាចដើរលឿនផងដែរ។

សម្តេចធិបតី ហ៊ុន ម៉ាណែត បានថ្លែងបន្តថា បើសន្តិភាពផ្តល់ឱកាសហើយដាក់ទិសដៅត្រូវ គោលនយោបាយត្រូវ យើងនឹងមានសមត្ថភាពប្រកួតប្រជែង និងបង្កើនភាពម្ចាស់ការឯករាជ្យរបស់កម្ពុជា។

ក្នុងឱកាសអញ្ជើញសម្ពោធទីតាំងសាកលវិទ្យាល័យជាតិគ្រប់គ្រង សាខាវាលស្បូវ និងប្រគល់សញ្ញបត្រជូននិស្សិតជ័យលាភីនៃសាកលវិទ្យាល័យជាតិគ្រប់គ្រង នៅព្រឹកថ្ងៃទី១៥ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត បានបញ្ជាក់ថា សមត្ថភាពយើង មិនទាន់បានធ្វើគ្រប់ជ្រុងជ្រោយនោះទេ ប៉ុន្តែទៅថ្ងៃមុខកិច្ចការសំខាន់ជាច្រើនយើងត្រូវម្ចាស់ការធ្វើខ្លួនឯង ហើយក្នុងនោះយើងត្រូវកសាងធនធានមនុស្សរបស់យើងដែលអាចអោយយើងមានភាពម្ចាស់ការ ៕