នគរបាលស្រុកឯកភ្នំ ឃាត់ខ្លួនបុរសម្នាក់ក្រោយប្រើកាំបិតផ្គាក់កាប់សម្លាប់យុវជនម្នាក់

ភ្នំពេញ៖ កម្លាំងផ្នែកព្រហ្មទណ្ឌសហការជាមួយកម្លាំងអន្តរាគមន៍នៃអធិការដ្ឋាននគរបាលស្រុកឯកភ្នំ នៅថ្ងៃទី១៥ខែកុម្ភៈនេះ បានបើកកិច្ចប្រតិបត្តិការចុះបង្រ្កាបនិងឃាត់ខ្លួនជនសង្ស័យម្នាក់ឈ្មោះ ឃន ចម្រើន ហៅ ងិត ភេទប្រុស អាយុ៣០ឆ្នាំ បន្ទាប់ពីបានយកកាំបិតផ្គាក់កាប់ទៅលើជនរងគ្រោះត្រូវចំសៀតផ្កាលើត្រចៀកខាងឆ្វេងបណ្តាលឱ្យស្លាប់ កាលពីថ្ងៃទី១៤ ខែកុម្ភៈ ស្ថិតភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង។

សមត្ថកិច្ចបានឱ្យដឹងបន្តថា នៅវេលាម៉ោង២៣៖០០នាទីយប់ ជនរងគ្រោះឈ្មោះ សោម មេសា ភេទប្រុស អាយុ១៦ឆ្នាំ កំពុងតែអង្គុយលេងនៅខាងក្រោមផ្ទះរបស់មិត្តភក្ដិ្ត ស្របពេលដែលជនសង្ស័យដែលជាមនុស្សប្រើប្រាស់គ្រឿងញៀន និងកំពុងបែកថ្នាំស្រាប់បានយកកាំបិតផ្គាំកប្រវែងជិត១ម៉ែត្ររួចធ្វើសកម្មភាពកាប់សំដៅទៅលើជនរងគ្រោះត្រូវចំសៀតផ្កាលើត្រចៀកខាងឆ្វេងបណ្តាលឱ្យស្លាប់ភ្លាមៗនៅកន្លែងកើតហេតុ។

ក្រោយកើតហេតុសមត្ថកិច្ចបានចុះបង្រ្កាប និងបាននាំខ្លួនជនសង្ស័យលើបញ្ជូនទៅកាន់អធិការដ្ឋាននគរបាលស្រុកឯកភ្នំ និងធ្វើការសាកសួរដើម្បីរៀបចំកសាងសំណុំរឿងបញ្ជូនបន្តទៅការិយាល័យជំនាញចាត់ការតាមនីតិវិធីច្បាប់៕