រដ្ឋមន្ត្រីការបរទេសចិន និងរដ្ឋមន្ត្រីការបរទេសអាមេរិក ជួបគ្នា ក្នុងទីក្រុងមុយនិក

(ប៉េកាំង)៖ ក្រសួងការបរទេសចិន នៅថ្ងៃសៅរ៍ ទី១៧ ខែកុម្ភៈនេះបាននិយាយថារដ្ឋមន្ត្រីការបរទេសចិន លោក Wang Yi បានពិភាក្សាពីលទ្ធភាពនៃការដក ទណ្ឌកម្មប្រឆាំងនឹងក្រុមហ៊ុន និងក្រុមមន្ត្រីរបស់ចិន នៅក្នុងជំនួបជាមួយរដ្ឋមន្ត្រីការបរទេសអាមេរិក លោក Antony Blinken នាឱកាសដែល ប្រមុខការទូតទាំង២ ចូលរួមសន្និសីទសន្តិសុខទីក្រុងមុយនិក ក្នុងប្រទេសអាលឺ្លម៉ង់។

តាមក្រសួងការបរទេសចិន ជំនួបរវាងលោក Wang Yi និងលោក Antony Blinken បានប្រព្រឹត្តទៅកាលពីថ្ងៃសុក្រ ទី១៦ ខែកុម្ភៈ ហើយក្នុងជំនួបនោះ ប្រមុខការទូតទាំង២ ក៏បានពិភាក្សាគ្នាផងដែរពីការសម្របសម្រួលការផ្លាស់ប្ដូររវាងប្រជាជន និងប្រជាជន ព្រមទាំងផ្លាស់ប្ដូរទស្សនយល់ឃើញចំពោះបញ្ហា ក្នុងតំបន់ ក្នុងនោះរួមមានសង្រ្គាមនៅអ៊ុយក្រែន និងឧបទ្វីបកូរ៉េ។

ក្រសួងមិនបានបញ្ជាក់អ្វីលម្អិតបន្ថែមនោះទេ ដោយគ្រាន់តែឱ្យដឹងថាបេសកជនពិសេស ទទួលបន្ទុកកិច្ចឧបទ្វីបកូរ៉េនៃប្រទេសទាំង២ កំពុងរក្សាទាក់ទងគ្នា ហើយថាជំនួបរវាងលោក Wang Yi និងលោក Blinken ប្រព្រឹត្តទៅប្រកបដោយ លក្ខណៈស្ថាបនា និងស្មោះត្រង់។

គួរបញ្ជាក់ថា ចិន និងសហរដ្ឋអាមេរិក មានភាពរីកចម្រើនមួយចំនួនក្នុងទំនាក់ទំនងទេ្វភាគី ចាប់តាំងពីប្រធានាធិបតីចិន លោក ស៊ី ជីនពីង និងប្រធានាធិបតីអាមេរិក លោក ចូ បៃដិន បានជួបគ្នាកាលពីខែវិច្ឆិកា ឆ្នាំ២០២៣ ជាទីដែលមេដឹកនាំទាំង២ បានឯកភាពគ្នាលើកិច្ចសហប្រតិបត្តិការមួយចំនួន ដូចជាការស្ដារបណ្ដាញទំនាក់ទំនងយោធាឡើងវិញ និងការប្រយុទ្ធប្រឆាំងការជួញដូរគ្រឿងញៀន fentanyl៕