អភិបាលខេត្តស្ទឹងត្រែង ដាក់បទបញ្ជាយ៉ាងមុឺងម៉ាត់ដល់អាជ្ញាធរក្រុង ស្រុកត្រូវចាត់វិធានការជាបន្ទាន់បង្ក្រាបល្បែងស៊ីសងខុសច្បាប់គ្រប់ប្រភេទ
ភ្នំពេញ៖ នាថ្ងៃទី១៦ ខែកុម្ភៈ ឆ្នាំ២០២៤ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានដាក់បទបញ្ជាយ៉ាងមុឺងម៉ាត់ដល់អាជ្ញាធរក្រុង ស្រុកទាំង៦ ត្រូវចាត់វិធានការជាបន្ទាន់បង្ក្រាបល្បែងស៊ីសងខុសច្បាប់គ្រប់ប្រភេទ។
ជាមួយគ្នានេះ ឯកឧត្តមអភិបាលខេត្ត បានណែនាំដល់អាជ្ញាធរក្រុង ស្រុក ឲ្យបញ្ឈប់ជាបន្ទាន់នូវការអនុញ្ញាតបើកទីតាំងថ្មីនៃអាជីវកម្មឆ្នោតឡូតូ ល្បែងផ្សងសំណាង និងចាត់វិធានការបង្ក្រាបទីតាំងអាជីវកម្មឆ្នោតឡូតូ និងល្បែងស៊ីសង ខុសច្បាប់គ្រប់ប្រភេទ ក្នុងភូមិសាស្ត្រខេត្តស្ទឹងត្រែង។
សូមបញ្ជាក់ជូនដែរថា តបតាមកម្មវត្ថុ និងយោងតាមលិខិតរបស់រដ្ឋបាលខេត្ត បានឲ្យដឹងថា ដើម្បីរក្សាបាននូវសន្តិសុខ សុវត្ថិភាពសង្គម និងជំរុញការអនុវត្តច្បាប់ ឲ្យស្របតាមគោលការណ៍ នីតិរដ្ឋ និងកម្មវិធីនយោបាយរបស់រាជរដ្ឋាភិបាលកម្ពុជា ជាពិសេសធានាបានសុខសន្តិភាព ការអភិវឌ្ឍន៍ ការ លើកកម្ពស់ជីវភាពប្រជាពលរដ្ឋឲ្យមានការរីកចម្រើនជាលំដាប់ សមស្របទៅតាមយុទ្ធសាស្ត្របញ្ចកោណរបស់ រាជរដ្ឋាភិបាលកម្ពុជា និងដោយមានការយកចិត្តទុកដាក់ខ្ពស់ពីថ្នាក់ដឹកនាំ អាជ្ញាធរគ្រប់លំដាប់ថ្នាក់ ក្នុងការ អនុវត្តន៍នូវគោលនយោបាយភូមិ-ឃុំ-សង្កាត់ មានសុវត្ថិភាព និងធ្វើការបង្ក្រាបរាល់បទល្មើសជាប្រចាំ ធ្វើឲ្យប្រជាពលរដ្ឋមានជំនឿទុកចិត្តមកលើការដឹកនាំរបស់រាជរដ្ឋាភិបាល និងអាជ្ញាធរពាក់ព័ន្ធផងដែរ។
ក្នុងន័យនេះ រដ្ឋបាលខេត្ត ស្នើឲ្យលោកឧត្តមសេនីយ៍ទោស្នងការនគរបាលខេត្ត លោកឧត្តម សេនីយ៍ត្រីមេបញ្ជាការកងរាជអាវុធហត្ថខេត្ត លោកអភិបាលក្រុង-ស្រុកទាំង៦ ចូលរួមអនុវត្តទប់ស្កាត់ និងបញ្ឈប់ជាបន្ទាន់នូវការអនុញ្ញាតបើកទីតាំងថ្មីនៃអាជីវកម្មឆ្នោតឡូតូ ល្បែងផ្សងសំណាងគ្រប់ប្រភេទ និងបន្ត ស្រាវជ្រាវបង្ក្រាបនូវទីតាំងលេងល្បែងស៊ីសងខុសច្បាប់ និងបទល្មើសគ្រប់ប្រភេទក្នុងដែនសមត្ថកិច្ចរបស់ខ្លួន ព្រមទាំងចាត់វិធានការតាមច្បាប់ឲ្យបានម៉ឺងម៉ាត់បំផុត។
អាស្រ័យដូចបានជម្រាបជូនខាងលើនេះ សូម លោកឧត្តមសេនីយ៍ទោស្នងការនគរបាលខេត្ត លោកឧត្តមសេនីយ៍ត្រីមេបញ្ជាការកងរាជអាវុធហត្ថខេត្ត លោកអភិបាលក្រុង-ស្រុកទាំង៦ ជ្រាប និងចាត់ចែង អនុវត្តឲ្យមានប្រសិទ្ធភាពខ្ពស់ ៕
