សម្ដេចធិបតី៖ រាជរដ្ឋាភិបាលកំពុងខិតខំកសាងស្ពាន ផ្លូវ ដើម្បីសម្រួលចរាចរណ៍ និងការដឹកជញ្ជូនរបស់ពលរដ្ឋ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា នៅតំបន់ច្បារអំពៅមានសន្ទុះរីកចម្រើនយ៉ាងឆាប់រហ័ស ដែលធ្វើឱ្យការកកស្ទះចរាចរណ៍កើតមានជាញឹកញាប់ ធ្វើឱ្យខាតបង់ថវិកានិងពេលវេលារបស់បងប្អូនប្រជាពលរដ្ឋ។

សម្តេចធិបតី បានថ្លែងដូច្នេះ ក្នុងឱកាសដែលសម្តេចបានអញ្ជើញជាអធិបតីក្នុងពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) នៅព្រឹកថ្ងៃទី១៩ ខែកុម្ភៈ ឆ្នាំ២០២៤។

សម្តេចធិបតី ហ៊ុន ម៉ាណែត បានថ្លែងថា បើទោះបីបច្ចុប្បន្នមានស្ពានព្រះមុនីវង្ស និងស្ពានព្រែកសំរោងក្រុងតាខ្មៅ រួមជាមួយស្ពានកោះពេជ្រឆ្លងទៅកោះនរា ដែលទើបនឹងសម្ពោធដាក់ឱ្យប្រើប្រាស់កាលពីចុងឆ្នាំ២០២៣ ក៏ដោយ ក៏នៅមិនទាន់អាចបំពេញតម្រូវការនៃកំណើនប្រជាជន និងយានយន្តនៅតំបន់នោះឱ្យបានទាំងស្រុងនៅឡើយទេ។

ក្នុងឱកាសនោះ សម្តេចធិបតី ក៏បានគូសបញ្ជាក់ថា ដោយសារកំណើននិងបញ្ហាកកស្ទះចរាចរណ៍នេះហើយ ទើបរាជរដ្ឋាភិបាលត្រូវរិះរកវិធីសាស្ត្រ និងមធ្យោបាយរំដោះសម្រួលបញ្ហាកកស្ទះចរាចរណ៍នេះជាបន្តបន្ទាប់ តួយ៉ាងដូចការបើកការដ្ឋានសាងសង់នៅថ្ងៃនេះជាដើម។ ការបើកការដ្ឋាននៅថ្ងៃនេះ មិនមែនសម្រាប់តែប្រជាពលរដ្ឋនៅរាជធានីភ្នំពេញទេ ប៉ុន្តែថែមទាំងផ្តល់អត្ថប្រយោជន៍ដល់បងប្អូនប្រជាពលរដ្ឋទាំងអស់នៅទូទាំងប្រទេស ដើម្បីជួយសម្រួលដល់ការធ្វើដំណើរឆ្លងកាត់ពីត្រើយខាងកើតទៅកាន់ត្រើយខាងលិច បានឆាប់រហ័ស និងមានសុវត្ថិភាព ៕