នាយករដ្ឋមន្ត្រី ហ៊ុន ម៉ាណែត៖ ការដាក់ទិសដៅអភិវឌ្ឍន៍ហេដ្ឋារចនាសម្ព័ន្ធនៅកម្ពុជា គឺមិនដកថយឡើយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងឲ្យដឹងថា ការដាក់ទិសដៅអភិវឌ្ឍន៍ហេដ្ឋារចនាសម្ព័ន្ធ នៅក្នុងប្រទេសកម្ពុជា គឺរាជរដ្ឋាភិបាល មិនដកថយនោះឡើយ។

ក្នុងឱកាសអញ្ជើញបើកការដ្ឋានសាងសង់ស្ពានឆ្លងទន្លេបាសាក់ តភ្ជាប់ពីតំបន់ចាក់អង្រែក្រោម ទៅព្រែកប្រា តម្លៃជាង៦០លានដុល្លារ នាថ្ងៃទី១៩ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត បញ្ជាក់ថា «នៅក្នុងរាជរដ្ឋាភិបាល អាណត្ដិទី៧ នៅក្នុងហេដ្ឋារចនាសម្ព័ន្ធ ការតភ្ជាប់នៅក្នុងរយៈពេល៦ខែនេះ (ខ្វះ៣ថ្ងៃទៀត) ខ្ញុំបានចូលរួមសម្ពោធសមិទ្ធផលច្រើន ការដាក់ទិសដៅហេដ្ឋារចនាសម្ព័ន្ធ យើងមិនថយនោះទេ»។

សម្តេចធិបតីលើកឡើងថា មានផ្លូវកាន់តែរឹងមាំ ក្តីសង្ឃឹមកាន់តែរឹងមាំ មានផ្លូវកាន់តែច្រើន ក្តីសង្ឃឹមក៏កាន់តែច្រើន។ សម្តេចធិបតី ហ៊ុន ម៉ាណែត បានថ្លែងថា ផ្លូវ ដូចសរសៃឈាមអ៊ីចឹង ផ្លូវទៅដល់ទីណា ជួយចិញ្ចឹមសរីរាង្គនៅទីនោះ។ សម្តេចថា ផ្លូវ គឺជួយសម្រួលក្នុងការធ្វើចរាចរណ៍ កាត់បន្ថយការចំណាយ និងបើកឱកាសឲ្យប្រជាពលរដ្ឋ អាចប្រកបរបបរកស៊ីបានផងដែរ។

សម្តេចធិបតីបន្ថែមថា ផ្លូវមិនមែនប្រើសម្រាប់តែការធ្វើចំណាកស្រុកប៉ុណ្ណោះទេ តែផ្លូវ បានរួមចំណែករុញរោងចក្រ និងការងារជូនប្រជាពលរដ្ឋ ៕