សម្ដេចធិបតី ឲ្យរៀបចំទិន្នន័យមន្រ្ដីរាជការ ពាក់ព័ន្ធនឹងករណីគ្រឿងញៀនទុក ក្នុងបញ្ជីមួយរបស់រាជរដ្ឋាភិបាល ជៀសវាងការចូលមកក្របខណ្ឌរដ្ឋវិញ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានណែនាំក្រសួងស្ថាប័ន ពាក់ព័នធឱ្យរៀបចំទិន្នន័យមន្រ្ដីរាជការរូបណា ដែលពាក់ព័ន្ធនឹងករណីគ្រឿងញៀនទុក នៅក្នុងបញ្ជីមួយរបស់រាជរដ្ឋាភិបាល ជៀសវាងការចូលមកក្របខណ្ឌរដ្ឋវិញ ។

ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផ្សព្វផ្សាយផែនការយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់លើកទី៩ នារសៀលថ្ងៃទី២០ ខែកុម្ភៈ ឆ្នាំ២០២៤ សម្ដេចធិបតី ហ៊ុន ម៉ាណែត ក៏បានស្នលដល់ស្ថាប័នដែលមានមន្ត្រីខ្លួន ត្រូវ បណ្ដេញចេញពីក្របខណ្ឌជាមន្ត្រីរាជការ ត្រូវសហការចែករំលែកទិន្នន័យ ពាក់ព័ន្ធនឹងការបណ្ដេញចេញនោះ ទៅក្រសួងមុខងារសាធារណៈ ដើម្បីបញ្ជៀសកុំឱ្យបុគ្គលរូបនោះ ដាក់ពាក្យទៅ បម្រើការងារនៅស្ថាប័នផ្សេងទៀតបាន។

ជាមួយគ្នានោះសម្ដេចធិបតី ហ៊ុន ម៉ាណែត គូសបញ្ជាក់ថា តាមរយៈការដាក់ចេញនូវវិធានការច្បាស់លាស់ ដើម្បីលុបបំបាត់គ្រឿងញៀន សម្ដេចសង្ឃឹមថា នៅអំឡុង ១០ ឬ ១៥ ឆ្នាំខាងមុខ បញ្ហាគ្រឿង ញៀន នឹងត្រូវថយចុះ ឬ លុបបំបាត់ទាំងស្រុង ៕