សម្តេចធិបតី៖ យើងត្រូវចូលរួមសហការទាំងអស់គ្នាដើម្បីទប់ស្កាត់ការជួញដូរគ្រឿងញៀន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានថ្លែងថា បញ្ហាគ្រឿងញៀន មិនមែនជាបញ្ហាដាច់ឡែកនៅក្នុងប្រទេសកម្ពុជាមួយនោះទេ ប៉ុន្តែគឺជាបញ្ហាដែលកើតមាននៅគ្រប់តំបន់ គ្រប់ប្រទេសទាំងអស់ ហើយប្រទេសដែលមានច្បាប់ត្រឹមត្រូវ ដែលអ្នកជួញដូរត្រូវមានទោសប្រហារជីវិត ក៏នៅតែមានបញ្ហាចោទរឿងបញ្ហាគ្រឿងញៀននេះដែរ។
សម្តេចធិបតី ហ៊ុន ម៉ាណែត បានថ្លែងយ៉ាងដូច្នេះ ក្នុងឱកាសដែលសម្តេចបានអញ្ជើញបិទសន្និបាតបូកសរុបការងារត្រួតពិនិត្យគ្រឿងញៀនឆ្នាំ២០២៣ និងលើកទិសដៅការងារឆ្នាំ២០២៤ និងផ្សព្វផ្សាយផែនការយុទ្ធនាការលើកទី៩ នារសៀលថ្ងៃទី២០ ខែកុម្ភៈ ឆ្នាំ២០២៤នេះ។
សម្តេចធិបតី ហ៊ុន ម៉ាណែត បានសង្កត់ធ្ងន់ថា ប្រទេសមហាអំណាចដែលបានចំណាយរាប់ពាន់លានដុល្លារក្នុងមួយឆ្នាំ ក៏នៅតែប្រឈមនឹងបញ្ហាគ្រឿងញៀនដែរ ដោយសារតែវាជាបញ្ហាស្មុគស្មាញ វិវដ្ដលឿនឆាប់រហ័ស។ ចំណុចនេះសួរថា តើកម្ពុជាត្រូវព្រលែងលែងកម្ចាត់គ្រឿងញៀនឬ? ការលើកឡើងបែបនេះ គឺស្មើនឹងភាពអស់សង្ឃឹម។ ចម្លើយគឺ «អត់ទេ» យើងគ្មានជម្រើស ហើយយើងក៏មិនអាចឱ្យកម្ពុជា ១០-២០ឆ្នាំទៀត ពោរពេញទៅដោយគ្រឿងញៀននោះដែរ ៕
