ឯកឧត្តម ស្វាយ សំអ៊ាង៖ សម្ដេចធិបតី កំពុងបន្តជួសជុលស្លាកស្នាមប្រវត្តិសាស្រ្តកម្ពុជា ដ៏សែនជូរចត់ដោយសង្រ្គាម និងកំពុងកសាងប្រវត្តិសាស្រ្តថ្មីពោរពេញដោយក្តីសង្ឃឹម និងអនាគតរុងរឿង
ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង បានលើកឡើងថា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា កំពុងបន្តជួសជុលនូវស្លាកស្នាមប្រវត្តិសាស្រ្តកម្ពុជាដ៏សែនជូរចត់ដោយសង្រ្គាមរ៉ាំរ៉ៃ និងកំពុងកសាងនូវប្រវត្តិសាស្រ្តថ្មីពោរពេញដោយក្តីសង្ឃឹម និងអនាគតរុងរឿងសម្រាប់ប្រទេសជាតិ និងប្រជាជនកម្ពុជា។
ការលើឡើងរបស់ឯកឧត្ដមអភិបាលខេត្តស្ទឹងត្រែង បែបនេះធ្វើឡើងក្នុងឱកាសអញ្ជើញចូលរួម ពិធីបិទអង្គសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា២០២២-២០២៣ និងលើកទិសដៅឆ្នាំសិក្សា២០២៣-២០២៤ នារសៀលថ្ងៃទី២២ ខែកុម្ភៈ ឆ្នាំ២០២៤នេះ ។
ឯកឧត្តមអភិបាលខេត្ត បានមានប្រសាសន៍ថា សម្តេចធិបតី គឺជាថ្នាក់ដឹកនាំដ៏ឆ្នើមពោរពេញថាមពល និងចំណេះដឹង ដែលអាចធ្វើឱ្យប្រទេសជាតិ និងប្រជាជនកម្ពុជាទាំងអស់ទទួលបាននូវអនាគតល្អ និងមានការរីកចម្រើនកាន់តែប្រសើរឡើង។ សម្តេចធិបតី កំពុងដាក់ចេញគោលនយោបាយសំខាន់ៗក្នុងការជំរុញលើកកម្ពស់ជីវភាពរស់នៅរបស់ប្រជាពលរដ្ឋ តាមរយៈការបង្កើតនូវឱកាសការងារ ទីផ្សារ លើកកម្ពស់វិស័យកសិកម្ម សេដ្ឋកិច្ច-សង្គម អប់រំ សុខាភិបាល សេវាសាធារណៈ និងកសាងហេដ្ឋារចនាសម្ព័ន្ធរូបវ័ន្ត ជាដើម។ ជាមួយគ្នានោះ សម្តេចធិបតី បាននិងកំពុងបន្ត មរតក ប្រវត្តិសាស្រ្តពីសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី ក្នុងការថែរក្សាសន្តិភាព លុបបំបាត់ទុក្ខវេទនារបស់ប្រជាពលរដ្ឋ។
ក្នុងនាមរដ្ឋបាលខេត្តស្ទឹងត្រែង ក៏ដូចជាប្រជាពលរដ្ឋកម្ពុជា សូមគោរពថ្លែងអំណរគុណ និងវាយតម្លៃខ្ពស់គ្រប់រដ្ឋបាលថ្នាក់ក្រោមជាតិ អាជ្ញាធរដែលដីគ្រប់ជាន់ថ្នាក់ និងគ្រប់ភាគីពាក់ព័ន្ធ ត្រូវបន្តអនុវត្តនូវអនុសាសន៍ណែនាំដ៏ខ្ពង់ខ្ពស់របស់ សម្តេចធិបតី នាយករដ្ឋមន្រ្តី ក្នុងការដោះស្រាយបញ្ហានានា ៕
