ក្រសួងសាធារណការ ជំរុញក្រុមហ៊ុនកូរ៉េ ពន្លឿនការសាងសង់ផ្លូវជាតិលេខ៤៨ កោះកុងឱ្យសម្រេចតាមការកំណត់

ភ្នំពេញ៖ នាព្រឹកថ្ងៃទី២៣ ខែកុម្ភៈ ឆ្នាំ២០២៤ ក្រសួងសាធារណការ និងដឹកជញ្ជូន បានបើកកិច្ចប្រជុំត្រួតពិនិត្យរួមគ្នាលើកទី៤ លើវឌ្ឍនភាពគម្រោងលើកកម្រិតគុណភាពផ្លូវជាតិលេខ៤៨ ក្នុងកិច្ចប្រជុំនោះក្រសួងបានជំរុញឱ្យក្រុមហ៊ុនសាងសង់កូរ៉េ ពន្លឿនការងារសាងសង់ផ្លូវជាតិលេខ៤៨ កោះកុង នៅក្នុងរដូវប្រាំងនេះឱ្យសម្រេចបានតាមគម្រោងផែនការដែលបានកំណត់។

ក្រសួងបញ្ជាក់ថា កិច្ចប្រជុំធ្វើឡើងដើម្បីពិនិត្យមើលវឌ្ឍនភាពសាងសង់ ស្ថានភាពជាក់ស្តែងនៃការអនុវត្តគម្រោង តាមរយៈការជំរុញផែនការអនុវត្តការគ្រប់គ្រងគុណភាព ការផ្គត់ផ្គង់សម្ភារគ្រឿងចក្រ និងកម្លាំងពលកម្ម។ លើកឡើងនូវសំណូមពរ បញ្ហាប្រឈម និងដំណោះស្រាយរបស់ក្រុមហ៊ុន ព្រមទាំងទិសដៅការងារបន្តសំដៅពន្លឿនការងារសាងសង់នៅក្នុងរដូវប្រាំងនេះឱ្យសម្រេចបានតាមគម្រោង តាមផែនការដែលបានកំណត់។

ជាមួយគ្នានេះ ក្រសួងបានក្រើនរំឭក ដល់ក្រុមហ៊ុនសាងសង់ត្រូវយកចិត្តទុកដាក់ខ្ពស់លើបទដ្ឋានបច្ចេកទេស មិនត្រូវឱ្យមានភាពចន្លោះប្រហោង សំដៅធ្វើឱ្យខ្សែផ្លូវនេះមានគុណភាព អាចប្រើប្រាស់បានយូរអង្វែង និងត្រូវយកចិត្តទុកដាក់ លើបញ្ហាសុវត្ថិភាពចរាចរណ៍តាមការដ្ឋានសាងសង់។ ធ្វើការបំពាក់គ្រឿងបរិក្ខាសុវត្ថិភាពឱ្យបានគ្រប់គ្រាន់ និងជំរុញឱ្យក្រុមហ៊ុនសាងសង់កំណាត់ផ្លូវនេះត្រូវអនុវត្តតាមបទដ្ឋានបច្ចេកទេស និងសៀវភៅបន្ទុកឱ្យបានជាដាច់ខាត។ ពិសេសត្រូវអនុលោមតាមលក្ខខណ្ឌអាទិភាពចំនួនពីរគឺ ទី១. សំណង់ផ្លូវមានគុណភាពរឹងមាំអាចប្រើប្រាស់បានយូរអង្វែង និងទី២.ការបញ្ចប់គម្រោងតាមផែនការដែលបានកំណត់។

ក្រសួងបន្ថែមថា គិតមកដល់ថ្ងៃទី២០ ខែកុម្ភៈ ឆ្នាំ២០២៤ គម្រោងលើកកម្រិតគុណភាពផ្លូវលេខ៤៨ សម្រេចវឌ្ឍនភាពការងារសាងសង់បាន៤២,៧១ភាគរយ ហើយគ្រោងបញ្ចប់វឌ្ឍនភាពសាងសង់នៅខែមេសា ឆ្នាំ២០២៥ខាងមុខ។ គួរជម្រាបថា រាជរដ្ឋាភិបាលនីតិកាលទី៧ នៃរដ្ឋសភា នៅតែចាត់ទុកផ្លូវជាអាទិភាពចម្បងបន្ទាប់ពីមនុស្ស ព្រោះផ្លូវមិនត្រឹមតែជួយសម្រួលដល់ចរាចរប៉ុណ្ណោះទេ ថែមទាំងជាសរសៃឈាមទៅចិញ្ចឹមគ្រប់សរីរាង្គនៃការអភិវឌ្ឍជាតិ លើកកម្ពស់ជីវភាព និងសុខុមាលភាពប្រជាជន។

សូមរំឭកថា គម្រោងសាងសង់ផ្លូវ ជាតិលេខ៤៨ ត្រូវបានបើកការដ្ឋានកាលពីថ្ងៃទី៣ ខែមករា ឆ្នាំ២០២២ មានប្រវែង ១៤៨គីឡូម៉ែត្រ ចាប់ផ្តើមនៅត្រង់បំបែកផ្លូវជាតិលេខ៤ ចំណុចបង្គោលគីឡូម៉ែត្រលេខ១៤១+៧៥០ រហូតដល់ក្រុងខេមរភូមិន្ទ ខេត្តកោះកុង។ ជាប្រភេទផ្លូវបេតុងកៅស៊ូ (AC) កម្រាស់៧សង់ទីម៉ែត្រ និងជាប្រភេទបេតុងសរសៃដែកត្រង់ផ្លូវប្រសព្វ មានកម្រាស់២៥សង់ទីម៉ែត្រ។ គម្រោងផ្លូវនេះ គ្រោងបញ្ចប់ការសាងសង់នៅក្នុងអំឡុង ខែមិថុនា ឆ្នាំ២០២៤ ប៉ុន្តែធ្លាប់មានភាពយឺតយ៉ាវបណ្តាលមកពីកត្តាភូមិសាស្ត្រ អាកាសធាតុ និងបញ្ហាកូវីដ-១៩ ក្រុមហ៊ុនអនុវត្តការសាងសង់បានស្នើសុំពន្យាពេលចំនួន១០ខែ ដោយគ្រោងបញ្ចប់នៅខែមេសា ឆ្នាំ២០២៥ វិញ៕