ត្រឹមដើមឆ្នាំ២០២៤ ក្រសួងសុខាភិបាលរកឃើញចំនួនអ្នកកើតជំងឺគ្រុនឈាមប្រមាណ ជាង២ពាន់ករណី

ភ្នំពេញ៖ គិតចាប់តាំងពីថ្ងៃទី១ ខែមករា​ រហូតដល់ថ្ងៃទី២៣ ខែកុម្ភៈ ឆ្នាំ២០២៤ ក្រសួងសុខាភិបាលបានរកឃើញចំនួនអ្នកកើតជំងឺគ្រុនឈាមប្រមាណ២៦០០នាក់ ខណៈឆ្នាំ២០២៣មានត្រឹម៩០០នាក់ ប៉ុន្តែចំនួននេះមិនបង្ហាញថា មានមនុស្សស្លាប់នោះទេ។ យ៉ាងណាតួលេខខាងលើបានហក់ឡើងយ៉ាងខ្ពស់ ពោលគឺកើនឡើង២ដងបើធៀបនឹងឆ្នាំ២០២៣។

លោកវេជ្ជ​បណ្ឌិត ហ៊ុយ រ៉េកុល បានឱ្យដឹងបន្ថែមថា ការរកឃើញចំនួននៃអ្នកកើតជំងឺគ្រុនឈាមដ៏ច្រើនសន្ធឹកសន្ធាប់នេះ មិនមែនមានន័យថា ក្រសួងខ្វះការយកចិត្តទុកដាក់ និងមិនមានវិធានការទប់ស្កាត់នោះទេ ប៉ុន្តែគឺទាក់ទងទៅនឹងកត្តាសមត្ថភាពការប្រមូលទិន្នន័យរបស់ក្រសួងទំនើប បើទោះបីជាអ្នកជំងឺស្ថិតនៅទីកន្លែងណា ក៏ក្រសួងអាចទៅប្រមូលទិន្នន័យពីអ្នកជំងឺបានដែរ។

យ៉ាងណា អ្នកជំនាញរូបនេះបានបញ្ជាក់បន្ថែមថា កត្តាដែលជំរុញឱ្យចំនួនអ្នកកើតជំងឺគ្រុនឈាមនៅកម្ពុជា នៅតែបន្តកើនឡើង គឺដោយសារតែការវិវត្តនៃមនុស្សជាតិមានចំនួនច្រើន ហើយជម្រកនៃការកើនឡើងរបស់មូសខ្លា ក៏កាន់តែច្រើនដែរ។ ដោយសារមនុស្សភាគច្រើនពូកគេមិនបានយកចិត្តទុកដាក់ទៅលើកាក់សំណល់សំរាមដូចជា កែវដាក់ភេសជ្ជៈ កំប៉ុង សំបកកង់រថយន្ត កង់ម៉ូតូ ឱ្យបានត្រឹមត្រូវ បញ្ហាទាំងអស់នោះហើយទើបនាំឱ្យមូសខ្លាមានចំនួនរិតតែច្រើន ហើយអ្នកកើតជំងឺគ្រុនឈាម ក៏កាន់តែច្រើនឡើងៗដែរ។

ទោះជាយ៉ាងណា លោកវេជ្ជ​បណ្ឌិត ហ៊ុយ រ៉េកុល បានទទូចឱ្យប្រជាពលរដ្ឋទាំងអស់ត្រូវចំណាយពេលយ៉ាងតិចឱ្យបានម្តងក្នុងមួយសប្តាហ៍ ដើម្បីសម្អាតផ្ទះរបស់ខ្លួន ជាពិសេសត្រូវចាក់ដីលុបនៅទីតាំងដែលមានទឹកដក់ ឬប្រមូលសំបកកង់រថយន្ត កង់ម៉ូតូ ទៅទុកដាក់នៅទីតាំងដែលមូសមិនអាចរស់នៅបាន។ បន្ថែមលើនេះ បើឪពុកម្តាយដែលសង្ស័យថា កូនមានជំងឺគ្រុនឈាមត្រូវនាំយកទៅមន្ទីរពេទ្យរដ្ឋឱ្យបានទាន់ពេលវេលា ដើម្បីកុំហួសពេលរហូតមិនអាចសង្រ្គោះបាន។

លោកបានពន្យល់បន្តថា៖«ជំងឺគ្រុនឈាម អត់មានថ្នាំពិសេសជួយទេ ពេទ្យទេវតាក៏ជួយអត់បានដែរ បើទៅដល់ពេទ្យយឺតយ៉ាវ គឺអាចនឹងប៉ះពាល់ដល់ការគម្រាមកំហែងដល់អាយុជីវិត»៕