ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៅខេត្តមណ្ឌលគិរី បានប្រព្រឹត្តទៅយ៉ាងល្អប្រសើរ
ភ្នំពេញ៖ លោក គិន ជាន ប្រធានគណៈកម្មការរៀបចំការបោះឆ្នោតខេត្តមណ្ឌលគិរី បានឱ្យដឹងថានៅព្រឹកថ្ងៃអាទិត្យ ទី២៥ ខែកុម្ភៈ ឆ្នាំ២០២៤នេះ ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៅខេត្តមណ្ឌលគិរី បានប្រព្រឹត្តទៅយ៉ាងល្អប្រសើរ ហើយអ្នកមានសិទ្ធិបោះឆ្នោតបាន បង្ហាញវត្តមានគ្រប់ចំនួន នៅការិយាល័យបោះឆ្នោតលេខ៨០០៣ ស្ថិតនៅសាលាបឋមសិក្សាហ៊ុនសែន សែនមនោរម្យ ស្ថិតនៅក្នុងភូមិកណ្តាល សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។
លោក គិន ជាន បន្តថា នៅក្នុងដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នៅខេត្តមណ្ឌលគិរី បានឱ្យដឹងថា ស្ថិតនៅមណ្ឌលបោះឆ្នោតភូមិភាគទី៨ មានអង្គបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤នេះ មានចំនួនសរុប ១០៨រូប ជាសមាជិកក្រុមប្រឹក្សាឃុំសង្កាត់ទាំង ២១ឃុំ/សង្កាត់ក្នុងខេត្ត និងអ្នកតំណាងរាស្ត្រ ១រូបផងដែរ។
លោកបានបន្ថែមថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នៅខេត្តមណ្ឌលគិរី បាន ប្រព្រឹត្តដោយរលូន ចាប់ពីម៉ោង ៧:០០ព្រឹក នឹងត្រូវបញ្ចប់នៅម៉ោង ៣:០០ រសៀល។ ហើយគណបក្សនយោបាយដែលបានឈរឈ្មោះបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នេះមានចំនួន៤គណបក្សគឺ
១. គណបក្សប្រជាជនកម្ពុជា លេខរៀងទី១
២. គណបក្ស ឆន្ទៈខ្មែរ លេខរៀងទី២
៣. គណបក្សហ៊្វុនស៊ីនប៉ិច លេខរៀងទី៣
៤. គណបក្ស កម្លាំងជាតិ លេខរៀងទី៤ ៕