ឯកឧត្ដម ស្វាយ សំអ៊ាង ទទួលរ៉ាប់រងការចំណាយលើការធ្វើដំណើរ ការស្នាក់នៅ និងការហូបចុករបស់អង្គបោះឆ្នោតទាំង ១៥៥នាក់
ភ្នំពេញ៖ ឯកឧត្ដម ស្វាយ សំអ៊ាង សមាជិកគណៈកម្មាធិការកណ្ដាល និងជាប្រធានគណៈកម្មាធិការគណបក្សខេត្តស្ទឹងត្រែង បានលើកឡើងថា រាល់ការចំណាយលើការធ្វើដំណើរទាំងទៅទាំងមក ការស្នាក់នៅ និងការហូបចុករបស់អង្គបោះឆ្នោតទាំង ១៥៥នាក់ ដែលបានចូលរួមបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ។
ថ្លែងប្រាប់អង្គភាពសារព័ត៌មាន HOT News Asia នៅវេលាម៉ោង ០៣:០០នាទីរសៀលថ្ងៃទី២៥ ខែកុម្ភៈ ឆ្នាំ២០២៤ ឯកឧត្ដម ស្វាយ សំអ៊ាង បានថ្លែងអំណរគុណយ៉ាងជ្រាលជ្រាវដល់អង្គបោះឆ្នោតទាំងអស់ ដែលបានអញ្ជើញមកចូលរួមបោះឆ្នោត គ្រប់ៗគ្នា ដែលធ្វើឲ្យដំណើរការបោះឆ្នោត ប្រព្រឹត្តទៅដោយរលូន និងមានភាពស្ងប់ស្ងាត់ល្អ។
ជាមួយគ្នានោះឯឧត្ដមប្រធានគណៈកម្មាធិការ គណបក្សខេត្តស្ទឹងត្រែង ក៏បានជូនពរឲ្យអង្គបោះឆ្នោតទាំងអស់ ធ្វើដំណើរត្រឡប់ទៅគេហដ្ឋានវិញ ប្រកបដោយសុខសុវត្ថិភាពផងដែរ។
ឯកឧត្តម ស្វាយ សំអ៊ាង បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅជាទីបំផុតចំពោះអង្គបោះឆ្នោត មកពីគណបក្សប្រជាជនកម្ពុជាគ្រប់ៗរូប ដែលបានចូលរួមយ៉ាងសស្រាក់សស្រាំ ក្នុងសកម្មភាពនានានៃយុទ្ធនាការបោះឆ្នោតរបស់គណបក្សរយៈពេល ១៤ថ្ងៃ រហូតដល់ដំណើរការបោះឆ្នោត បានបញ្ចប់ទៅដោយរលូន។
ឯកឧត្ដម ស្វាយ សំអ៊ាង បានសង្កត់ធ្ងន់ថា នៅថ្ងៃទី២៥ ខែកុម្ភៈ ឆ្នាំ២០២៤ ត្រូវនឹងថ្ងៃអាទិត្យ ១រោជ ខែមាឃ ឆ្នាំថោះ បញ្ចស័ក ព.ស២៥៦៧ ជាថ្ងៃបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ហើយនេះគឺជាការបោះឆ្នោតមួយដ៏មានសារៈសំខាន់ សម្រាប់បុព្វហេតុបន្តកសាង និងការពារមាតុភូមិកម្ពុជានាំមកនូវសុខសន្តិភាព និងការអភិវឌ្ឍន៍លើគ្រប់វិស័យ។ ពិតណាស់រាជរដ្ឋាភិបាលបន្តវេន អាណត្តិទី៧ ដឹកដោយសម្ដេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃកម្ពុជា បានដាក់ចេញយុទ្ធសាស្ត្រ បញ្ជកោណ ដំណាក់កាលទី១ ដែលមានបាវចនា ចំនួន៥គឺ «កំណើន ការងារ សមធម៌ ប្រសិទ្ធិភាព និងចីរភាព និងមានអាទិភាព ចំនួន៥ គឺ «មនុស្ស ផ្លូវ ទឹក ភ្លើង និងបច្ចេកវិទ្យា» ដែលជាគ្រឹះ និងជាមធ្យោបាយសំខាន់ៗ នៃការសម្រេចបាននូវចក្ខុវិស័យ សម្រាប់ឆ្នាំ២០៥០។
ឯកឧត្ដមបន្ថែមថាពិតមែនតែការបោះឆ្នោតជ្រើសតាំងសមាជិកព្រឹទ្ធសភា ជាការបោះឆ្នោតអសកល ប៉ុន្តែគឺជាការបោះឆ្នោតដែលកើតចេញពីឆន្ទៈ និងបំណងប្រាថ្នារបស់ប្រជាជនកម្ពុជាពិតប្រាកដ ព្រោះថា សមាជិករដ្ឋសភា និងសមាជិកក្រុមប្រឹក្សា ឃុំ សង្កាត់ ដែលជាអ្នកបោះឆ្នោត គឺជាអ្នកតំណាងដ៏ឧត្តុង្គឧត្តមរបស់ប្រជាជនដែលបានប្រសូតចេញពីឆន្ទៈរបស់ប្រជាជន។
ជាមួយគ្នានោះ ឯកឧត្ដម ស្វាយ សំអ៊ាង បានសម្តែងគោរពដឹងគុណ និងសូមឱ្យបន្តអនុវត្តយ៉ាងម៉ឺងម៉ាត់ ខ្ជាប់ខ្ជួនតាមច្បាប់ បទបញ្ជា នីតិវិធី ក្រមសីលធម៌ និងគោរពនូវលទ្ធផល នៃការបោះឆ្នោត ដើម្បីរក្សាបរិយាកាសនយោបាយប្រកបដោយលក្ខណៈសេរី យុត្តិធម៌ សណ្តាប់ធ្នាប់ និងសុវត្ថិភាព ក្នុងគោលដៅពង្រឹងលទ្ធិប្រជាធិបតេយ្យ និងនីតិរដ្ឋនៅកម្ពុជាឱ្យកាន់តែរឹងមាំឡើង ៕
