អ៊ីរ៉ង់ ថ្កោលទោសការវាយប្រហារផ្លូវអាកាសចុងក្រោយរបស់អាមេរិក និងអង់គ្លេស លើរដ្ឋធានីយេម៉ែន

តេហេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani កាលពីថ្ងៃអាទិត្យ បានថ្កោលទោសយ៉ាងខ្លាំងចំពោះការវាយប្រហារកាលពីថ្ងៃសៅរ៍ ដោយយន្តហោះចម្បាំងអាមេរិក និងអង់គ្លេស ប្រឆាំងនឹងរដ្ឋធានីសាណារបស់យេម៉ែន។

លោកបានធ្វើការកត់សម្គាល់នៅក្នុងសេចក្តីថ្លែងការណ៍មួយដែលបានចេញផ្សាយនៅលើគេហទំព័ររបស់ក្រសួងការបរទេសអ៊ីរ៉ង់ ដោយពណ៌នាអំពីការវាយប្រហារដោយយោធាទ្រង់ទ្រាយធំដែលបានធ្វើឡើងកាលពីល្ងាចថ្ងៃសៅរ៍ថាជា ការបំពានលើច្បាប់ និងបទប្បញ្ញត្តិអន្តរជាតិដែលត្រូវបានទទួលស្គាល់ ក៏ដូចជាអធិបតេយ្យភាព និងបូរណភាពទឹកដីរបស់ប្រទេសយេម៉ែន។

លោក Kanaani បានឲ្យដឹងថា សហរដ្ឋអាមេរិក និងអង់គ្លេសបានបង្ហាញជាថ្មីម្តងទៀតថា ពួកគេគឺជា អ្នកគាំទ្រឧក្រិដ្ឋកម្មសង្រ្គាមរបស់អ៊ីស្រាអែល នៅក្នុងតំបន់ Gaza Strip និង West Bank ហើយផ្តល់អាទិភាពដល់ការប្តេជ្ញាចិត្តចំពោះសន្តិសុខ និងគោលដៅខុសច្បាប់របស់អ៊ីស្រាអែលលើសន្តិភាព និងសន្តិសុខអន្តរជាតិ។

លោក Kanaani បានបន្ថែមថា ជាមួយនឹងការវាយប្រហារបែបនេះ សហរដ្ឋអាមេរិក និងអង់គ្លេសបានស្វែងរកបង្កើនភាពតានតឹង និងវិបត្តិក្នុងតំបន់ ពង្រីកវិសាលភាពនៃសង្គ្រាម និងអស្ថិរភាព បង្វែរមតិសាធារណៈឱ្យឆ្ងាយពីឧក្រិដ្ឋកម្មសង្រ្គាមរបស់អ៊ីស្រាអែល និងផ្តល់ឱកាសឱ្យអ៊ីស្រាអែលបន្ត ឧក្រិដ្ឋកម្មសង្គ្រាមរបស់ខ្លួន។

លោក Kanaani បានបន្តថា ប្រតិបត្តិការយោធាបែបបំពាន និងឈ្លានពាន បែបនេះនឹងមិននាំទៅរកអ្វីនោះទេ ប៉ុន្តែការបង្កើនភាពអសន្តិសុខ និងអស្ថិរភាពនៅក្នុងតំបន់។

សាក្សីក្នុងតំបន់ និងអ្នកស្រុកបានឲ្យដឹងថា នៅក្នុងការវាយប្រហារកាលពីយប់មិញ យ៉ាងហោចណាស់មានកាំជ្រួចចំនួនបួនបានវាយប្រហារជំរុំយោធា Al-Siyanah ភាគខាងជើងនៃទីប្រជុំជន Sanaa បណ្តាលឱ្យមានការផ្ទុះ និងភ្លើងធំ ហើយយន្តហោះចម្បាំងបានវាយប្រហារជំរុំយោធាមួយនៅភាគខាងត្បូងនៃរដ្ឋធានី និងមួយទៀតជំរំនៅលើភ្នំមួយភាគខាងកើតនៃសាណា។

ប្រព័ន្ធផ្សព្វផ្សាយរបស់សហរដ្ឋអាមេរិក ដែលដកស្រង់សម្តីមន្ត្រីអាមេរិកអនាមិក បានរាយការណ៍ថា សហរដ្ឋអាមេរិក និងអង់គ្លេស បានវាយប្រហារទៅលើគោលដៅ Houthi ជាងរាប់សិប ដើម្បីឆ្លើយតបទៅនឹងការកើនឡើងនាពេលថ្មីៗនេះ នៅក្នុងការវាយប្រហាររបស់ក្រុមទៅលើនាវានៅសមុទ្រក្រហម និងឈូងសមុទ្រ Aden។

ក្រុមមន្ត្រីបានឲ្យដឹងថា យន្តហោះចម្បាំងរបស់អាមេរិក និងអង់គ្លេសបានវាយប្រហារទីតាំងប្រហែល ១៨កន្លែងនៅក្នុងការវាយប្រហាររួមគ្នាលើកទីបួននេះប្រឆាំងនឹងក្រុម Houthi ចាប់តាំងពីថ្ងៃទី១២ ខែមករា។

ក្រុម Houthis បានឲ្យដឹងថា ការវាយប្រហាររបស់ពួកគេគឺនៅក្នុងសាមគ្គីភាពជាមួយប៉ាឡេស្ទីន និងមានគោលបំណងបង្ខំអ៊ីស្រាអែល និងសម្ព័ន្ធមិត្តរបស់ខ្លួនឱ្យបញ្ឈប់ជម្លោះដ៏សាហាវនៅហ្គាហ្សា។

ប្រភព៖ Xinhua Net

ប្រែសម្រួលដោយ៖ ឡាយ លីហួ