អភិបាលខេត្តតាកែវ ណែនាំដល់អាជ្ញាធរនៅតាមមូលដ្ឋាន ត្រូវចុះបិទទីតាំងឆ្នោតផ្សងសំណាង ដែលកំពុងបន្តលួចដំណើការជាបន្ទាន់
ភ្នំពេញ៖ នាព្រឹកថ្ងៃចន្ទ ទី២៦ ខែកុម្ភៈ ឆ្នាំ២០២៤ ឯកឧត្តម អ៊ូច ភា អភិបាលខេត្តតាកែវ និងជាប្រធានគណៈបញ្ជាការឯកភាពរដ្ឋបាលខេត្ត បានអញ្ជើញបើកកិច្ចប្រជុំផ្សព្វផ្សាយបទបញ្ជាលេខ ០១ប.ប របស់រដ្ឋាភិបាលកម្ពុជា និងពង្រឹងណែនាំអំពីបញ្ហាគ្រឿងញៀន នៅទូទាំងខេត្តតាកែវ។
កិច្ចប្រជុំនេះក៏មានការអញ្ជើញចូលរួមដោយ លោកអភិបាលរងខេត្ត លោកឧត្តមអគ្គានុរក្សថ្នាក់លេខ២ គង់ ស៊ីថា ប្រធានពន្ធនាគារខេត្ត លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្ត លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងខេត្ត លោកឧត្តមសេនីយ៍ត្រី មាស តេន ស្នងការរងនគរបាលខេត្ត លោក លោកស្រី ប្រធានមន្ទីរអង្គភាពជុំវិញខេត្ត លោកអភិបាលស្រុក ក្រុង ទាំង១០ លោកអធិការនគរបាល និង លោកមេបញ្ជាការមូលដ្ឋានអាវុធហត្ថស្រុកក្រុង ទាំង១០ និងមន្រ្តីពាក់ព័ន្ធចូលរួមផងដែរ។
មានប្រសាសន៍ក្នុងកិច្ចប្រជុំនេះដែរ ឯកឧត្តម អ៊ូច ភា ក្នុងនាមជាប្រធានគណៈបញ្ជាការឯកភាពរដ្ឋបាលខេត្ត សូមធ្វើការណែនាំដល់ លោកស្នងការនគរបាលខេត្ត លោកមេបញ្ជាការកងរាជអាវុធហត្ថខេត្ត លោកអភិបាល ស្រុក ស្រុក និងអធិការនគរបាលស្រុកក្រុង ទាំងអស់ ត្រូវបន្តដាក់ប៉ុស្ដិ៍ត្រួតពិនិត្យ និងធ្វើការផាកពិន័យ តាមច្បាប់កំណត់ លើបុគ្គលណាដែលល្មើស ដើម្បីពង្រឹងការអនុវត្តបទបញ្ជារបស់ប្រមុខរាជរដ្ឋាភិបាលកម្ពុជា ដោយធ្វើការពិនិត្យ អាវុធជាតិផ្ទុះគ្រប់ប្រភេទ ជាតិអាលកុល (ជាតិស្រវឹង) ធ្វើតេស្ដិ៍សារធាតុញៀន ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍ ថែរក្សាសន្តិសុខ សណ្ដាប់ធ្នាប់ ទប់ស្កាត់ និងបង្ការរាល់បទល្មើសផ្សេងៗ បានទាន់ពេលវេលាដើម្បីសេចក្ដីសុខសាន្តរបស់ពលរដ្ឋ ក៏ដូចជាសង្គមជាតិ។
ឯកឧត្តមអភិបាលខេត្ត បានបញ្ជាក់សង្កត់បន្ថែមថា ចំពោះករណីទីតាំងឆ្នោតផ្សងសំណាង ដែលកំពុងបន្តលួចដំណើការនៅមូលដ្ឋានរបស់ខ្លួន ត្រូវចុះបិទទីតាំងទាំងអស់នោះជាបន្ទាន់ ព្រោះជាក់ស្ដែងក្រុមហ៊ុនឆ្នោតផ្សងសំណាងដែលច្បាប់អនុញ្ញាតត្រឹមត្រូវ គឺមានតែ ៤ក្រុមហ៊ុនតែប៉ុណ្ណោះ ដែលមានអាស័យដ្ឋានក្នុងក្រុងដូនកែវ រីឯទីតាំងជាង ៥០០ផ្សេងៗទៀត គឺ គ្មានច្បាប់នោះទេ ត្រូវចុះបិទ និងធ្វើកិច្ចសន្យាជាបន្ទាន់ជាមួយម្ចាស់ទីតាំង។
បន្ថែមពីនេះទៀត ឯកឧត្តមអភិបាលខេត្ត ក៏បានណែនាំដល់ លោកលោកស្រី ប្រធានមន្ទីរអង្គភាពទាំងអស់ ត្រូវចាប់ផ្ដើមធ្វើតេស្ដិ៍រកសារធាតុញៀនលើមន្រ្តីរបស់ខ្លួនចាប់ពីពេលនេះតទៅ ដើម្បីចូលរួមអនុវត្តបទបញ្ជាដ៏ម៉ឺងម៉ាត់របស់ ប្រមុខរាជរដ្ឋាភិបាល ក្នុងករណីពិនិត្យរកឃើញមន្រ្តីណាដែលមានផ្ទុកសារធាតុញៀន មន្ទីរអង្គភាពត្រូវធ្វើរបាយការណ៍ បញ្ជូនមកខេត្ត ដើម្បីអនុវត្តវិធានការរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា។
ឆ្លៀតឱកាសនោះដែរ ឯកឧត្តម អ៊ូច ភា បានបន្តធ្វើការណែនាំ ដល់អាជ្ញាធរមូលដ្ឋានទាំងអស់ ត្រូវបន្តធ្វើការតាមដានស្ថានភាពដំណាំស្រូវរបស់ពលរដ្ឋ ប្រសិនមានការខ្វះខាតទឹក នៅភូមិសាស្រ្តណាត្រូវធ្វើការបន្ទាន់មក រដ្ឋបាលខេត្ត ដើម្បីមានវិធានការជួយសង្រ្គោះបានទាន់ពេលវេលា ៕
