មេបញ្ជាការយោធភូមិភាគទី៤ អញ្ជើញបំពាក់គ្រឿងឥស្សរិយយស ជូនដល់នាយទាហាន នាយទាហានរង និងពលទាហាន យោធភូមិភាគទី៤
ភ្នំពេញ៖ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅថ្ងៃទី២៧ ខែកុម្ភៈ ឆ្នាំ២០២៤ បានអញ្ជើញជាអធិបតីភាព ក្នុងពិធីបំពាក់គ្រឿងឥស្សរិយយស ជូនដល់នាយទាហាន នាយទាហានរង និងពលទាហានចំនួន ៣៧ រូប របស់យោធភូមិភាគទី៤។ ដែលពិធីបំពាក់គ្រឿងឥស្សរិយយសនេះ ត្រូវបានប្រារព្ធធ្វើឡើងនៅក្នុងសិក្ខាសាលាប្រជុំបូកសរុបលទ្ធផលការងារយោធា សន្តិសុខ ឆ្នាំ២០២៣ និងទិសដៅអនុវត្តបន្ត ឆ្នាំ២០២៤ របស់យោធភូមិភាគទី៤ ។
ថ្លែងក្នុងពិធីបំពាក់គ្រឿងឥស្សរិយយស ឧត្តមសេនីយ៍ឯក មេបញ្ជាការ បានធ្វើការកោតសរសើរ ចំពោះការសម្រេចបាននូវលទ្ធផលការងារល្អ គឺកើតចេញពីការសហការគ្នារបស់យោធិនយើងទាំងអស់ដែលបានខិតខំអស់ពីកម្លាំងកាយចិត្ត ប្រាជ្ញាស្មារតីក្នុងការបំពេញភារកិច្ចដែលរដ្ឋាភិបាល ក្រសួងការពារជាតិ អគ្គបញ្ជាការ និងបញ្ជាការដ្ឋានកងទ័ពជើងគោក បានប្រគល់ជូន។ ឧត្តមសេនីយ៍ឯក បន្តមានប្រសាសន៍លើកឡើង អំពីសភាពការណ៍ថ្មីៗមួយចំនួន ជាពិសេសសភាពការណ៍នៅតាមខ្សែរបន្ទាត់ព្រំដែន ដល់បណ្តាកងឯកភាពចំណុះយោធភូមិភាគទី៤ ទាំងអស់បានជ្រាប ។ ឧត្តមសេនីយ៍ឯក មេបញ្ជាការ បានកើនរំលឹក ដល់បណ្តាកងឯកភាពចំណុះទាំងអស់ ដែលឈរជើងនៅជាប់តាមខ្សែរបន្ទាត់ព្រំដែន កម្ពុជា- ថៃ- ឡាវ ត្រូវបន្តយកចិត្តទុកដាក់អោយបានម៉ឺងម៉ាត់ ម្ចាស់ការត្រួតពិនិត្យ និងដើរល្បាតអោយបានជាប់ជាប្រចាំ ដើម្បីធានាការពារអោយបាននូវបូរណភាពដឹកដី និងទប់ស្កាត់អោយបាននូវរាល់បទល្មើសផ្សេងៗ ដែលអាចកើតមានឡើងជាយថាហេតុ។
ឧត្តមសេនីយ៍ឯក មេបញ្ជាការ បានបញ្ជាក់បន្ថែមទៀតថា ក្រៅពីការងារធានារក្សាសុខសុវត្តិភាព នៅក្នុងតំបន់ និងជាពិសេសការទទួលខុសត្រូវនៅតាមខ្សែរបន្ទាត់ព្រំដែនរបស់ ទិសយោធភូមិភាគទី៤ កន្លងទៅយោធភូមិភាគទី៤ សម្រេចបានយ៉ាងល្អនូវការងារជាច្រើនដូចជា ការងារប្រជុំកិច្ចការព្រំដែន RBC កម្ពុជា-ថៃ ការងារការពារថ្នាក់ដឹកនាំជាន់ខ្ពស់ ការងារប្រុងប្រៀបជួយសង្គ្រោះគ្រោះមហន្តរាយ ការងារប្រវត្តិសាស្ត្រយោធា ការងារជួយដឹកជញ្ជូនសម្ភារៈ គ្រឿងផ្ទះជូនប្រជាពលរដ្ឋ ដែលស្ម័គ្រចិត្តរើចេញពីតំបន់រមណីយដ្ឋានអង្គរ ទៅរស់នៅតំបន់អភិវឌ្ឍន៍ថ្មី រុនតាឯក និងពាក់ស្នែ និងការងារកសាងប្រៀបការពារជាតិជាដើម។ ឆ្លងតាមរយៈលទ្ធផលការងារដែលសម្រេចបានកន្លងមកនៅក្នុងឆ្នាំ២០២៣ រួចរាល់ ឯកឧត្តមបានដាក់ចេញនូវទិសដៅការងារថ្មីមួយចំនួនទៀតសម្រាប់អនុវត្តបន្តនៅក្នុង ឆ្នាំ២០២៤ ផងដែរ។
ឧត្តមសេនីយ៍ឯក មេបញ្ជាការ បានផ្តាំផ្ញើរ ដល់គ្រប់បណ្តាអង្គភាពទាំងអស់ត្រូវបន្តយកចិត្តទុកដាក់ ហ្វឹកហ្វឺនរៀនសូត្រតាមបណ្តាកងឯកភាព នូវយុទ្ធសាស្ត្រ យុទ្ធវិធី ជំនាញជាក់ស្តែង ការងារអប់រំចិត្តសាស្ត្រ សតិអារម្មណ៍ ការងារបំផុសចលនាប្រឡងប្រណាំងទៅតាមបណ្តាអង្គភាព និងមិនអោយមានការប្រើប្រាសគ្រឿងញៀននៅក្នុងជួរកងយោធពលខេមរភូមិន្ទ ជាពិសេសនៅក្នុងអង្គភាពយោធភូមិភាគទី៤។
បញ្ជាក់: ឯកឧត្តម ឧត្តមសេនីយ៍ឯក ទេព សំអាន អគ្គនាយករង អគ្គនាយកដ្ឋានភស្តុភា ហិរញ្ញវត្ថុ ក្រសួងការពារជាតិ ប្រចាំទិសយោធភូមិភាគទី៤ បានប្រគល់សម្ភារៈដែលជាអំណោយដ៏ថ្លៃថ្លា របស់ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ ព្រមទាំងបានផ្តល់កិត្តិយសប្រគល់ប័ណ្ណសរសើរ លិខិតសរសើរ ជូនដល់យោធភូមិភាគទី៤ និងបណ្តាអង្គភាពចំណុះយោធភូមិភាគទី៤ ផងដែរ ៕