ប្រធានរដ្ឋសភាកម្ពុជា នឹងអញ្ជើញបំពេញទស្សនកិច្ចជាផ្លូវការ និងចូលរួមកិច្ចប្រជុំកំពូលប្រធានសភាជាស្រ្ដី នៅសាធារណរដ្ឋបារាំង នាខែមីនាខាងមុខនេះ
ភ្នំពេញ៖ តបតាមការអញ្ជើញរបស់ លោកជំទាវ Yaël Braun-Pivet ប្រធានរដ្ឋសភានៃសាធារណរដ្ឋបារាំង គណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជា ដឹកនាំដោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នឹងអញ្ជើញបំពេញទស្សនកិច្ចផ្លូវការនៅសាធារណរដ្ឋ បារាំង ព្រមទាំងចូលរួមកិច្ចប្រជុំកំពូលប្រធានសភាជាស្ត្រីលើកដំបូង ដែលរដ្ឋសភានៃសាធារណរដ្ឋបារាំងធ្វើជាម្ចាស់ផ្ទះ ចាប់ពី ថ្ងៃទី២ ដល់ថ្ងៃទី១១ ខែមីនា ឆ្នាំ២០២៤ ខាងមុខនេះ។
យោងតាមសេចក្តីជូនដំណឹងរបស់អគ្គលេខាធិការដា្ឋនរដ្ឋសភាជាតិ បានឲ្យដឹងថា កិច្ចប្រជុំកំពូលនេះ នឹងមានការអញ្ជើញចូលរួមពីប្រធានសភាជាស្ត្រីនៅទូទាំងពិភពលោកចំនួន២៥រូប ក្នុងគោលបំណង ដើម្បីជំរុញបន្ថែមនូវការទូតសភាបុរេសកម្ម ដែលគិតគូពីបញ្ហាស្រ្តីនិងក្មេងស្រី និងលើកកម្ពស់សិទ្ធិស្ត្រីនៅទូទាំងពិភពលោក ក្នុង អាជីពនយោបាយរបស់សមាជិកសភា និងប្រឆាំងរាល់ទម្រង់នៃអំពើហិង្សាលើស្រ្តី សំខាន់ជាងនេះទៅទៀត សភាដើរតួនាទីនាំមុខ ក្នុងការជំរុញឱ្យមានសមភាពរវាងស្ត្រី និងបុរស តាមរយៈការស្នើ និងការអនុម័តច្បាប់។
សេចក្តីជូនដំណឹងដដែល បានបន្តថា កិច្ចប្រជុំកំពូលនេះមានវេទិកាតុមូលចំនួនពីររួមមាន៖ (១)ការអប់រំប្រកបដោយសមភាព ការប្រយុទ្ធប្រឆាំង នឹងអំពើហិង្សាលើស្រ្តី និងសុខភាពស្ត្រី និង(២)សមភាពរវាងស្ត្រីនិងបុរសក្នុងវិស័យនយោបាយ និងការអះអាងអំពីតួនាទីគម្រូរបស់ស្ត្រី។
ក្នុងដំណើរខាងលើ គណៈប្រតិភូកម្ពុជាគ្រោងនឹងអញ្ជើញចូលជួបសវនការជាមួយប្រធានរដ្ឋសភាបារាំង ចូលរួមពិធីសម្ពោធការតាំងពិព័រណ៍ ដែលឧទ្ទិសដល់សិទ្ធិនយោបាយរបស់ស្ត្រីនៅលើពិភពលោក ជំនួបទ្វេភាគីជាមួយប្រធានរដ្ឋសភាឥណ្ឌូនេស៊ី អាល្លឺម៉ង់ និងប៊ែលហ្ស៊ិក ព្រមទាំងជំនួបជាមួយអគ្គប្រតិភូនៃសភានិយាយភាសាបារាំង(APF) ផងដែរ។ ក្រៅពីនេះ ក៏នឹងមានជំនួបរវាងគណៈប្រតិភូ កម្ពុជាជាមួយក្រុមមិត្តភាពសភាកម្ពុជា-បារាំង ជំនួបជាមួយគណៈកម្មការសង្គមកិច្ចនៃរដ្ឋសភាបារាំង និងជំនួបរវាងអគ្គលេខាធិការ នៃរដ្ឋសភាបារាំងនិងកម្ពុជាផងដែរ។
សូមបញ្ជាក់ជូនថា ដំណើរទស្សនកិច្ចជាផ្លូវការ និងការចូលរួមកិច្ចប្រជុំកំពូលប្រធានសភាជាស្ត្រីនៅសាធារណរដ្ឋបារាំង នាឱកាសនេះ មិនត្រឹមតែអាចរួមចំណែកដល់ការលើកកម្ពស់ទំនាក់ទំនងសា្ថប័ននីតិប្បញ្ញត្តិ និងទំនាក់ទំនាក់ទំនងរវាងប្រជាជននៃប្រទេសទាំង ពីរកម្ពុជា-បារាំងឱ្យកាន់តែជិតស្និទ្ធប៉ុណ្ណោះទេ ប៉ុន្តែក៏ជាឱកាសមួយដើម្បីពង្រឹងវិស័យការទូតសភាកម្ពុជាជាមួយសភានៅលើ សកលលោកផងដែរ ជាអាទិ៍ ការលើកកម្ពស់សមភាពយេនឌ័រ គោលការណ៍ពហុនិយម ដើម្បីថែរក្សាការពារសុខសន្តិភាព ស្ថិរភាព និងវិបុលភាពសង្គមប្រកបដោយចីរភាព និងបរិយាបន្នជូនប្រជាពលរដ្ឋ៕
