សម្តេចធិបតី សម្តែងការដឹងគុណចំពោះ សម្តេច ស ខេង ដែលបានដឹកនាំក្រសួងមហាផ្ទៃ ប្រកបដោយភាពប៉ិនប្រសប់ក្នុងរយៈពេល ៦អាណត្តិ នៃរាជរដ្ឋាភិបាល

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសម្តែងនូវការដឹងគុណចំពោះ សម្តេចក្រឡាហោម ស ខេង អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបានដឹកនាំក្រសួងមហាផ្ទៃ ប្រកបដោយភាពប៉ិនប្រសប់ក្នុងរយៈពេល ៦ អាណត្តិ នៃរាជរដ្ឋាភិបាល ចាប់ពីឆ្នាំ ១៩៩៣ ដល់ឆ្នាំ ២០២៣ ។

ក្នុងឱកាសអញ្ជើញជាពិធីបិទសន្និបាតត្រួតពិនិត្យ លទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់ក្រសួងមហាផ្ទៃ នាថ្ងៃទី២៩ ខែកុម្ភៈ ឆ្នាំ២០២៤ សម្តេចមហាបវរធិបតី ហ៊ុន ម៉ាណែត បានមានប្រសាសន៍បន្តថា ក្រោមការដឹកនាំរបស់ សម្តេចក្រឡាហោម បានតស៊ូជម្នះគ្រប់ឧបសគ្គ និងសម្រេចបានជោគជ័យលើ បេសកកម្មធំៗ ពាក់ព័ន្ធនឹងការចូលរួមថែរក្សាសុខសន្តិភាព, អធិបតេយ្យជាតិ, បូរណភាពទឹកដី, ស្ថិរភាព នយោបាយ និង ការថែរក្សា ការពារសន្តិសុខជាតិ, សណ្តាប់ធ្នាប់សាធារណៈ និង សុវត្ថិភាពសង្គម បានយ៉ាងល្អ ដែលធានាបាននូវការរស់នៅដ៏សុខសាន្តរបស់ប្រជាពលរដ្ឋ ក៏ដូចជាធានាបាននូវសន្តិសុខ សម្រាប់ការបោះឆ្នោត, កិច្ចប្រជុំធំៗ និង ព្រឹត្តិការណ៍អន្តរជាតិនានានៅប្រទេសកម្ពុជា ដោយរលូន និង ជោគជ័យ ។

សម្ដេចធិបតី បន្ថែមថា ទន្ទឹមនេះ, ការងារកែទម្រង់វិមជ្ឈការ និងវិសហមជ្ឈការ មានវឌ្ឍនភាព និងសម្រេចបាន សមិទ្ធផលនានាជាច្រើន, ក្នុងនោះ រចនាសម្ព័ន្ធ ប្រព័ន្ធគ្រប់គ្រង និងនីតិវិធីបំពេញការងាររបស់រដ្ឋបាល ថ្នាក់ក្រោមជាតិ ត្រូវបានរៀបចំ និងពង្រឹងជាបណ្តើរៗ, ទាំងក្នុងការអភិវឌ្ឍស្ថាប័ន, ការអភិវឌ្ឍសមត្ថភាព ធនធានមនុស្ស និងប្រសិទ្ធភាពនៃការអនុវត្តការងារ ដើម្បីធានាដល់ការលើកកម្ពស់គុណភាព និង ប្រសិទ្ធភាពនៃការផ្តល់សេវាសាធារណៈ, ការអភិវឌ្ឍមូលដ្ឋានឆ្លើយតបនឹងតម្រូវការ និងការដោះស្រាយ បញ្ហាប្រឈមជូនប្រជាពលរដ្ឋបានទាន់ពេល និងចំគោលដៅនៃបញ្ហា។

សម្ដេចគូសបញ្ជាក់ថា តាមរយៈការកែទម្រង់នេះ, រដ្ឋបាល ថ្នាក់ក្រោមជាតិនីមួយៗ កាន់តែមានសមត្ថភាព និងលទ្ធភាពជាបណ្តើរៗ ក្នុងការផ្តល់សេវា និងដោះស្រាយ បញ្ហាជូនប្រជាពលរដ្ឋក្នុងដែនសមត្ថកិច្ចរបស់ខ្លួន ។ ការផ្ទេរមុខងារ ត្រូវបានធ្វើឡើងជាបណ្តើរៗទៅឱ្យ រដ្ឋបាលថ្នាក់ក្រោមជាតិតាមប្រភេទនីមួយៗ ដែលក្នុងនោះមានមុខងារចំនួនពីរ ដែលបានផ្ទេរទៅឱ្យរដ្ឋបាល ថ្នាក់ក្រោមជាតិ ហើយតម្រូវឱ្យមានការយកចិត្តទុកដាក់ និងផ្តល់អាទិភាពខ្ពស់ក្នុងនីតិកាលទី ៧ នេះ គឺ មុខងារក្នុងវិស័យសុខាភិបាល និងមុខងារវិស័យអប់រំ ៕