សម្តេចធិបតី៖ រាជរដ្ឋាភិបាលដឹកនាំដោយគណបក្សប្រជាជនកម្ពុជាបានទទួលប្រជាប្រិយភាពកាន់តែខ្លាំងពីមួយអាណត្តិទៅមួយអាណត្តិ តាមរយៈសន្ទុះនៃការគាំទ្ររបស់ប្រជាពលរដ្ឋទាំងក្នុង និងក្រៅប្រទេស
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលដឹកនាំដោយគណបក្សប្រជាជនកម្ពុជាបានទទួលប្រជាប្រិយភាពកាន់តែខ្លាំងពីមួយអាណត្តិទៅមួយអាណត្តិ តាមរយៈសន្ទុះនៃការគាំទ្ររបស់ប្រជាពលរដ្ឋទាំងក្នុង និងក្រៅប្រទេសដែលបន្តកើនឡើងឥតឈប់ឈរ ពិសេសការគាំទ្រតាមរយៈការចូលរួមបោះឆ្នោតគាំទ្រដល់គណបក្សប្រជាជនកម្ពុជា កាលពីខែកក្កដាឆ្នាំ ២០២៣ ដោយទទួលបានសំឡេងគាំទ្ររហូតដល់ទៅជាង ៨២% នៃចំនួនអ្នកបោះឆ្នោតសរុប។
នាឱកាសអញ្ជើញជួបសំណេះសំណាលជាមួយសហគមន៍ខ្មែរ រស់នៅប្រទេសអូស្រ្តាលី និងនូវែលហ្សេឡង់ នៅថ្ងៃទី៣ ខែមីនា ឆ្នាំ២០២៤ សម្ដេចធិបតី នាយករដ្ឋមន្រ្ដី មានប្រសាសន៍ថា ការជួបជុំគ្នាជាមួយបងប្អូខ្មែរ រស់នៅក្នុងប្រទេសអូស្រ្តាលី និងនូវែលហ្សេឡង់ នៅថ្ងៃនេះគឺបានបង្ហាញពីស្មារតីសាមគ្គីជាតិខ្មែរការរួបរួមគ្នារវាងខ្មែរតែមួយ និងបង្ហាញពីកត្តាសុខសន្ដិភាពរបស់កម្ពុជាផងដែរ។
សម្ដេចធិបតី ហ៊ុន ម៉ាណែត ក៏បានកោតសរសើរដល់ប្រជាពលរដ្ឋខ្មែររស់នៅក្នុងប្រទេសអូស្រ្តាលី និងនូវែលហ្សេឡង់ ដែលបានមកគាំទ្រស្វាគមន៍សម្ដេចធិបតី និងគណៈប្រតិភូ ដែលរក្សាបាននូវភាពចាស់ទុំ ការយល់ដឹងនៃសិទ្ធិសេរីភាពជាពលរដ្ឋខ្មែរ មិនប្រើប្រាស់សកម្មភាព ឬពាក្យសម្ដីមិនសមរម្យឡើយ៕
