សម្តេចធិបតី៖ រាជរដ្ឋាភិបាលថ្មី អត់មានត្រូវការពេលដើរទេ កើតមកគឺរត់តែម្តង

ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា រាជរដ្ឋាភិបាលថ្មីមានអាយុ៦ខែ ១០ថ្ងៃ។ រាជរដ្ឋាភិបាលថ្មី អត់មានត្រូវការពេលដើរទេ កើតមកគឺរត់តែម្តង មិនអាចដើរទេព្រោះមនុស្សច្រើនណាស់ត្រូវការរាជរដ្ឋាភិបាលជួយ។

សម្ដេចធិបតីបានថ្លែងបែបនេះ ក្នុងពិធីសំណេះសំណាលជាមួយបងប្អូនសហគមន៍ខ្មែររស់នៅក្នុងប្រទេសអូស្រ្តាលី និងនូវ៉ែលសេឡង់ នៅទីក្រុងម៉ែលប៊ន ប្រទេសអូស្ត្រាលី នាថ្ងៃទី០៣ ខែមីនា ឆ្នាំ២០២៤នេះ។

សម្តេចធិបតីបានឱ្យដឹងថា គណៈរដ្ឋមន្ត្រីរបស់រាជរដ្ឋាភិបាលថ្មី បានផ្លាស់ប្តូរស្ទើរតែទាំងស្រុង តែគណៈរដ្ឋមន្ត្រីបានផ្លាស់ប្តូរ តែមិនមានការផ្លាស់ប្តូរគោលនយោបាយនោះឡើយ។

សម្តេចធិបតី ហ៊ុន ម៉ាណែត បានបន្ថែមថា ប្រវត្តិសាស្ត្ររបស់កម្ពុជា នៅពេលផ្លាស់ប្តូរមេដឹកនាំ ភាគច្រើនជួបសង្គ្រាម។ ប៉ុន្តែសម្រាប់ការប្តូរក្រុមដឹកនាំតាមសំឡេងបោះឆ្នោតនៅពេលនេះ គឺដំណើរការរលូន ដែលជាព្រឹត្តិការណ៍ប្រវត្តិសាស្ត្ររបស់កម្ពុជា៕