រដ្ឋមន្ត្រីក្រសួងសាធារណការ ដាក់ចេញនូវគោលការណ៍ ១០ចំណុច ដើម្បីធានាប្រសិទ្ធភាព និងនិរន្តរភាព នៃការផ្សព្វផ្សាយក្នុងបណ្តាញសង្គមផ្លូវការ របស់អង្គភាពក្រោមឱវាទក្រសួង

ភ្នំពេញ៖ នាព្រឹកថ្ងៃពុធ ទី០៦ ខែកុម្ភៈ ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី យន្តការផ្សព្វផ្សាយក្នុងវិស័យសាធារណការ និងដឹកជញ្ជូន ដោយមានការអញ្ជើញចូលរួមពី លោកជំទាវ ឯកឧត្តម ជាថ្នាក់ដឹកនាំ លោក លោកស្រី ប្រធានអង្គភាពនានាក្រោមឱវាទក្រសួង ព្រមទាំងសិក្ខាកាមសរុបប្រមាណជាង ២០០រូប។

វគ្គបណ្តុះបណ្តាលនេះ ត្រូវបានធ្វើឡើងក្នុងគោលបំណងដើម្បីធានាបាននូវប្រសិទ្ធភាព ក្នុងការអនុវត្តយន្តការការងារជំរុញការផ្សព្វផ្សាយ ក្នុងវិស័យសាធារណការ និងដឹកជញ្ជូន ឱ្យបានកាន់តែទូលំទូលាយ ឆ្លុះបញ្ចាំងពីសកម្មភាព និងសមិទ្ធផលការងារ ស្តែងចេញពីការខិតខំប្រឹងប្រែងរបស់ថ្នាក់ដឹកនាំ មន្ត្រីរាជការ បុគ្គលិកគ្រប់ជាន់ថ្នាក់របស់ក្រសួង និងផ្សារភ្ជាប់ទំនាក់ទំនងកាន់តែល្អប្រសើរ ជាមួយសាធារណជន និងបណ្តាញសារព័ត៌មាន ស្របតាមគោលនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់ សម្តេចមហាបវរធិបតីនាយករដ្ឋមន្ត្រី នៃព្រះរាជាណាចក្រកម្ពុជា និងទិសដៅការងាររបស់ក្រសួង ក្រោមការដឹកនាំរបស់ ឯកឧត្តមរដ្ឋមន្ត្រី។

ជាកិច្ចចាប់ផ្តើមនៃអង្គពិធី ឯកឧត្តម ហ៊ាង សុទ្ធាយុត្តិ អគ្គនាយកបច្ចេកវិទ្យា និងទំនាក់ទំនងសាធារណៈ បានឡើងធ្វើរបាយការណ៍អំពីបច្ចុប្បន្នភាព នៃប្រព័ន្ធផ្សព្វផ្សាយផ្លូវការរបស់ក្រសួង ដែលក្នុងនោះមាន ៨ ដូចជា៖ គេហទំព័រផ្លូវការ, Telegram Channel, Facebook, TikTok, YouTube, X (Twitter), Instagram និងកម្មវិធីទូរស័ព្ទ MPWT News App។ ក្នុងចំណោមប្រព័ន្ធផ្សព្វផ្សាយទាំងអស់ ប្រព័ន្ធបណ្តាញសង្គម Facebook ផ្លូវការរបស់ក្រសួង ត្រូវបានចាត់ទុកថាជាប្រព័ន្ធដែលពេញនិយមជាងគេ និងមានអ្នកគាំទ្ររហូតដល់ទៅ ១,៥លាននាក់។

ក្នុងឆ្នាំ២០២៣ ក្រសួងសាធារណការ និងដឹកជញ្ជូន បានផ្សព្វផ្សាយតាមប្រព័ន្ធបណ្តាញសង្គមផ្លូវការ របស់ក្រសួង ដែលមាតិការជាវីដេអូ មាន ១៧៧ មាតិកា និងការផ្សាយជាអត្ថបទរូបភាព ១,៤៦៧មាតិកា ឬអាចនិយាយបានថាក្នុងមួយថ្ងៃមានការចុះផ្សាយជាមធ្យមប្រមាណ ៤ មាតិកា។ បន្ថែមពីការងារផ្សព្វផ្សាយដូចបានរៀបរាប់ខាងលើ ការតាមដាន ប្រមូល និងឆ្លើយតបមតិយោបល់របស់ប្រជាពលរដ្ឋ ក្នុងឆ្នាំ២០២៣ សរុបមានចំនួន ៥៦,៨១៨ករណី រួមមាន៖ (១)ការឆ្លើយតប និងដោះស្រាយមតិយោបល់ក្នុងហ្វេសប៊ុកក្រសួងមានចំនួន ៣៣,០០០ករណី និង (២)សម្របសម្រួល ប្រឹក្សាយោបល់ ផ្តល់ព័ត៌មានតាមទូរសព្ទ HOTLINE 1275 និងជួបផ្ទាល់ នៅមណ្ឌល សេវាសាធារណៈ មានចំនួន ២៣,០០០ករណី។

ដើម្បីឱ្យយន្តការយន្តការផ្សព្វផ្សាយក្នុងវិស័យសាធារណការ និងដឹកជញ្ជូន ដែលបានដាក់ចេញនេះ អាចអនុវត្តទៅប្រកបដោយភាពរលូន មានប្រសិទ្ធភាព និងនិរន្តរភាព ឯកឧត្តមរដ្ឋមន្ត្រី បានដាក់ចេញនូវគោលការណ៍ចំនួន ១០ចំណុច និងបានស្នើឱ្យគ្រប់អង្គភាពពាក់ព័ន្ធអនុវត្តតាម រួមមាន៖

១.ត្រូវបង្កើតបណ្តាញផ្សព្វផ្សាយសង្គមផ្លូវការរបស់អង្គភាពនីមួយៗ (ករណីមិនទាន់ មាន) ជាពិសេស Facebook និង TikTok ព្រមទាំងបណ្តាញសង្គមផ្សេងៗទៀត តាមលទ្ធភាពដែលអង្គភាពអាចគ្រប់គ្រងបាន។

២.ត្រូវធានារាល់ការចែករំលែក ផ្សព្វផ្សាយ និងឆ្លើយតបមតិយោបល់របស់ប្រជាពលរដ្ឋលើបណ្តាញសង្គមផ្លូវការត្រូវបានអនុវត្តជាប្រចាំ ប្រកបដោយស្មារតីបុរេសកម្ម និងការទទួលខុសត្រូវខ្ពស់។

៣.រៀបចំកាលវិភាគសម្រាប់ធ្វើការផ្សព្វផ្សាយប្រចាំសប្តាហ៍ ក្នុងវិស័យសាធារណការ និងដឹកជញ្ជូន ព្រមទាំងបុណ្យជាតិ-អន្តរជាតិ សារថ្វាយព្រះពរ សារជូនពរ ប្រចាំឆ្នាំ២០២៤។

៤.រៀបចំរបាយការណ៍ផ្សព្វផ្សាយឆ្នាំ២០២៣ និងផែនការសកម្មភាពឆ្នាំ២០២៤ និង បញ្ជីឈ្មោះជនបង្គោលទទួលបន្ទុកទំនាក់ទំនងសាធារណៈរបស់អង្គភាព មកក្រសួង យ៉ាងយូរត្រឹម ថ្ងៃទី២៦ ខែមីនា ឆ្នាំ២០២៤។

៥.ជំរុញឱ្យថ្នាក់ដឹកនាំ មន្ត្រីរាជការ និងបុគ្គលិកនៃអង្គភាពក្រោមឱវាទក្រសួង ត្រូវធ្វើ ការតាមដាន និងចែករំលែក (Share) ព័ត៌មានដែលបានចុះផ្សាយលើប្រព័ន្ធផ្សព្វ ផ្សាយផ្លូវការរបស់ក្រសួង និងអង្គភាពរបស់ខ្លួន ឱ្យបានទូលំទូលាយ។

៦.សហការជាមួយអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ដើម្បីមាន មូលដ្ឋានធ្វើការសំយោគខ្លឹមសារយកទៅផ្សព្វផ្សាយ និងឆ្លើយតបជាសាធារណៈ ដោយ ចម្លងជូនជាប្រចាំនូវរាល់របាយការណ៍វឌ្ឍនភាពការងារផ្តល់សេវាសាធារណៈ និងវឌ្ឍនភាពការងារគម្រោង ព្រមទាំងឯកសារបទដ្ឋានគតិយុត្ត និងបញ្ជូនតាមគ្រប់រូបភាពនូវរាល់ព័ត៌មានទាន់ហេតុការណ៍ និងព្រឹត្តិការណ៍សំខាន់ៗ ដូចជា គ្រោះមហន្តរាយ ការខូចខាតផ្លូវថ្នល់ ស្ពាន ការផ្អាកចរាចរណ៍ ជាដើម ផ្តល់ព័ត៌មាន និងរបាយការណ៍តាមការចាំបាច់។

៧.ត្រូវឆ្លើយតបបំភ្លឺភ្លាមៗ និងប្រតិកម្មរហ័សចំពោះសំណួរ មតិយោបល់ ឬព័ត៌មាន មិនពិតនានា ដោយសហការជាមួយអ្នកនាំពាក្យក្រសួង អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ និងក្រុមការងារប្រតិកម្មរហ័ស ដើម្បីឆ្លើយតបជាមួយ អ្នកសារព័ត៌មាន និងប្រជាពលរដ្ឋ តាមការចាំបាច់។

៨.
គ្រប់អង្គភាពក្រោមឱវាទ ក្រុមការងារប្រតិកម្មរហ័ស និងអគ្គនាយដ្ឋានបច្ចេកវិទ្យា និងទំនាក់ទំនងសាធារណៈ ត្រូវសហការគ្នាយកចិត្តទុកដាក់ឆ្លើយតបលើមតិ យោបល់របស់ប្រជាពលរដ្ឋ ឬសកម្មភាពពាក់ព័ន្ធ ដែលស្ថិតក្រោមដែនសមត្ថកិច្ច របស់ខ្លួន។

៩.លើកសំណើបណ្តុះបណ្តាល ទៅកាន់អគ្គនាយកដ្ឋានបច្ចេកវិទ្យា និងទំនាក់ទំនង សាធារណៈ តាមការចាំបាច់ សំដៅពង្រឹងគុណភាពព័ត៌មានប្រកបដោយភាពពិត ត្រឹមត្រូវ និងលឿនរហ័ស ដើម្បីបង្កើនភាពទាក់ទាញដែលអាចស្រូបយក ប្រជាប្រិយភាព និងទំនុកចិត្តរបស់សាធារណជន។

១០.អង្គភាពក្រោមឱវាទក្រសួងទាំងអស់ត្រូវយកចិត្តទុកដាក់ ក្នុងវគ្គបណ្តុះបណ្តាលនេះ និងត្រូវអនុវត្តតាមយន្តការដូចមាននៅក្នុងសេចក្តីណែនាំ។

ឆ្លៀតក្នុងឱកាសនេះ ឯកឧត្តមរដ្ឋមន្ត្រី បានថ្លែងនូវការកោតសសើរ និងវាយតម្លៃខ្ពស់ចំពោះ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ក្រុមប្រតិកម្មរហ័ស និងអង្គភាពពាក់ព័ន្ធផ្សេងទៀត ដែលបានចូលរួមសហការក្នុងការរៀបចំ វគ្គបណ្តុះបណ្តាលស្តីពី យន្តការផ្សព្វផ្សាយក្នុងវិស័យសាធារណការ និងដឹកជញ្ជូន នេះឡើង។ ជាមួយគ្នានេះ ឯកឧត្តមរដ្ឋមន្ត្រី ក៏បានធ្វើការក្រើនរំលឹកដល់គ្រប់អង្គភាពពាក់ព័ន្ធទាំងអស់ ត្រូវបន្តខិតខំឆ្លើយតប និងដោះស្រាយ ប្រកបដោយការទទួលខុសត្រូវខ្ពស់នូវកង្វល់ និងសំណូមពររបស់ ប្រជាពលរដ្ឋដោយប្រកាន់ខ្ជាប់នូវវប្បធម៌សេវាសាធារណៈ ក្រោមទិសស្លោក “មន្ត្រីរាជការជា ខ្ញុំបម្រើរាស្ត្រ មិនមែនជាចៅហ្វាយរាស្ត្រ” និងត្រូវរក្សាឱ្យបានជាប់ជានិច្ចនូវក្រមសីលធម៌ វិជ្ជាជីវៈ សុជីវធម៌ និងសីលធម៌ខ្ពស់ជាមួយប្រជាពលរដ្ឋ ៕