រដ្ឋលេខាធិការក្រសួងធនធានទឹក អញ្ជើញដឹកនាំវេទិកាសាធារណៈស្តីពីការផ្សព្វផ្សាយកញ្ចប់ថវិកាប្រចាំឆ្នាំ២០២៤
ភ្នំពេញ៖ នៅព្រឹកថ្ងៃពុធ ១១រោច ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៦ ខែមីនា ឆ្នាំ២០២៤ នេះ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារកំណែទម្រង់ការគ្រប់គ្រងហិរញ្ញវត្ថុសាធារណៈ បានអញ្ជើញជាអធិបតីភាពដឹកនាំកម្មវិធីវេទិកាសាធារណៈស្តីពីការផ្សព្វផ្សាយកញ្ចប់ថវិកាប្រចាំឆ្នាំ២០២៤ របស់ក្រសួងធនធានទឹក និងឧតុនិយម។
ឯកឧត្តមរដ្ឋលេខាធិការ បានឱ្យដឹងថា គោលបំណងរបស់វេទិកាសាធារណៈគឺការផ្សព្វផ្សាយកញ្ចប់ថវិកាប្រចាំឆ្នាំ២០២៤ របស់ក្រសួងជូនដល់សាធារណជន អ្នកសិក្សាស្រាវជ្រាវ ដៃគូអភិវឌ្ឍន៍ និងភាគីពាក់ព័ន្ធផ្សេងទៀត ដើម្បីបានយល់ដឹងអំពីអាទិភាពគោលនយោបាយរបស់ក្រសួង ទំហំថវិកាដែលត្រូវផ្តល់សម្រាប់កម្មវិធីនីមួយៗ និងសកម្មភាពអាទិភាពដែលក្រសួងត្រូវអនុវត្ត ដើម្បីសម្រេចលទ្ធផលដែលរំពឹងទុក ព្រមទាំងគោលនយោបាយរបស់ក្រសួង ក៏ដូចជាសេចក្តីត្រូវការរបស់ប្រជាពលរដ្ឋ។
សូមជម្រាបថា វេទិកាសាធារណៈនេះមានការចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គាធិការ អគ្គនាយកនៃអគ្គនាយកដ្ឋានកិច្ចការរដ្ឋបាល អគ្គនាយកនៃអគ្គនាយកដ្ឋានកិច្ចការបច្ចេកទេស ប្រធាននាយកដ្ឋាន និងប្រធានមជ្ឈមណ្ឌល ប្រធានមន្ទីររាជធានី-ខេត្ត និងសមាជិកក្រុមការងារកែទម្រង់រដ្ឋបាលសាធារណៈទាំងអស់ចំណុះក្រសួងធនធានទឹក និងឧតុនិយម ដៃគូអភិវឌ្ឍន៍ តំណាងក្រសួងស្ថាប័នពាក់ព័ន្ធ និងអ្នកសារព័ត៌មានផងដែរ ៕
