ឯកឧត្តម ហ៊ុន ម៉ានី អញ្ជើញបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រុមប្រឹក្សាយុវជនគ្រឹះស្ថានឧត្តមសិក្សា នៃ ស.ស.យ.ក

ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នារសៀលថ្ងៃទី៧ ខែមីនា ឆ្នាំ២០២៤នេះ បានអញ្ជើញជាអធិបតីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រុមប្រឹក្សាយុវជនគ្រឹះស្ថានឧត្តមសិក្សា នៃសហភាពសហព័ន្ធយុវជនកម្ពុជា (ស.ស.យ.ក.) នៅសណ្ឋាគារសុខាភ្នំពេញ ។

អញ្ជើញអមដំណើរនាឱកាសនោះរួមមាន ឯកឧត្តមអភិសន្តិបណ្ឌិត ស សុខា អនុប្រធានស.ស.យ.ក. និងជាប្រធានក្រុមប្រឹក្សាយុវជននៃគ្រឹះស្ថានឧត្តមសិក្សានៃស.ស.យ.ក. ឯកឧត្តម លោកជំទាវ សមាជិក សមាជិកា នៃគណៈអចិន្ត្រៃយ៍នៃគណៈកម្មាធិការកណ្តាលនៃស.ស.យ.ក. ឯកឧត្តម លោក លោកស្រី សមាជិកគណៈកម្មាធិការដឹកនាំចលនាយុវជនស្ម័គ្រចិត្តនៃស្ថាប័នរដ្ឋ និងឯកជន និងក្រុមការងារយុវជននៃគ្រឹះស្ថានឧត្តមសិក្សាប្រមាណ ៥៥០ នាក់។

ជាកិច្ចចាប់ផ្តើម ឯកឧត្តមអភិសន្តិបណ្ឌិត ស សុខា បានធ្វើការស្វាគមន៍យ៉ាងកក់ក្តៅចំពោះវត្តមាន ឯកឧត្តម ហ៊ុន ម៉ានី និងបានធ្វើរបាយការណ៍សង្ខេបអំពីដំណើរការ លទ្ធផលរបស់អង្គសន្និបាតកាលពីព្រឹកមិញ និងធ្វើរបាយការណ៍ស្តីពីលទ្ធផលការងារឆ្នាំ ២០២៣ ប្រកបដោយស្មារតីមុះមុត។ ឯកឧត្តមបានរំលេចផងដែរថា សមិទ្ធផលជាច្រើនត្រូវសម្រេចបាន ក្នុងឆ្នាំ២០២៣ កន្លងមក ដោយក្នុងនោះមានការសម្រេចផែនការរួម ៧០,១៦ ភាគរយ ធៀបទៅនឹងសកម្មភាពដែលបានកំណត់ក្នុងផែនការឆ្នាំ២០២៣ ផងដែរ។

ថ្លែងទៅកាន់អង្គពិធី ឯកឧត្តម ហ៊ុន ម៉ានី បានកោតសរសើរ និងវាយតម្លៃខ្ពស់ចំពោះសមិទ្ធិផលរបស់ក្រុមប្រឹក្សាយុវជននៃគ្រឹះស្ថានឧត្តមសិក្សា នៃស.ស.យ.ក. ដែលបានខិតខំប្រឹងប្រែង និងមានទំនួលខុសត្រូវខ្ពស់ក្នុងការបំពេញការងារកន្លងមក។

ឯកឧត្តមបន្តថា ក្រុមប្រឹក្សាយុវជននៃឧត្តមសិក្សានឹងបន្តផ្តល់ឱកាសដល់យុវជនក្នុងគ្រឹះស្ថានឧត្តមសិក្សាចូលរួមជាមួយស.ស.យ.ក. បន្ថែមទៀត ដើម្បីជាកម្លាំងគាំទ្រដ៏មានសក្តានុពល និងក្លាយជាសរសៃឈាមដ៏រស់រវើក និងរឹងមាំក្នុងការបន្តដំណើរលើមាគ៌ារួមរបស់ប្រជាជាតិកម្ពុជាតទៅមុខទៀត។