កាកបាទក្រហមកម្ពុជា ផ្សព្វផ្សាយពីខួបលើកទី ១៦១ ទិវាពិភពលោក កាកបាទក្រហម និងអឌ្ឍចន្ទក្រហម ៨ ឧសភា ២០២៤ ដល់និស្សិតនៃសាកលវិទ្យាល័យជាតិគ្រប់គ្រង
ភ្នំពេញ៖ ដើម្បីឈានឆ្ពោះទៅអបអរខួបលើកទី ១៦១ ទិវាពិភពលោក កាកបាទក្រហម និងអឌ្ឍចន្ទក្រហម ៨ ឧសភា ២០២៤ ក្រោមប្រធានបទ រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» កាកបាទក្រហមកម្ពុជា បានចុះផ្សព្វផ្សាយដល់និស្សិតនៃសាកលវិទ្យាល័យជាតិគ្រប់គ្រង។
កម្មវិធីនេះបានធ្វើឡើងក្រោមអធិបតីភាព លោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា និងលោកបណ្ឌិត សេង ប៊ុនធឿន សាកលវិទ្យាធិការរងសាកលវិទ្យាល័យជាតិគ្រប់គ្រង សាស្ត្រាចារ្យ លោកគ្រូ អ្នកគ្រូ និងនិស្សិត សរុបចំនួន ២៥០នាក់ នៅថ្ងៃទី៦ ខែមីនា ឆ្នាំ២០២៤។
លោកជំទាវអគ្គលេខាធិការ បាននាំព្រះរាជបន្ទូល ព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ និងជាព្រះប្រធានកិត្តិយសកាកបាទក្រហមកម្ពុជា និងប្រសាសន៍ផ្តាំផ្ញើសួរសុខទុក្ខរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះសាស្ត្រាចារ្យ លោកគ្រូ អ្នកគ្រូ និងនិស្សិតទាំងអស់ដែលបានចំណាយពេលវេលដ៏មានតម្លៃចូលរួមវគ្គផ្សព្វផ្សាយនាពេលនេះ។
លោកជំទាវបានបានបន្តថា «បន្ទាប់ពីទទួលបានរបាយការណ៍បូកសរុបការផ្សព្វផ្សាយ និងសំនួរ-ចម្លើយ រយៈពេលមួយម៉ោងកន្លះ ពីក្រុមការងារ ដែលង្ហាញនូវការចូលរួមដោយសោមនស្សរីករាយ និងការយកចិត្តទុកដាក់ស្តាប់ពីក្មួយៗនិស្សិតទាំងអស់ ខ្ញុំពិតជាមានមោទនភាពយ៉ាងខ្លាំងដែលក្មួយៗទទួលបាននូវ ចំណេះដឹងបន្ថែមទៀតអំពីហានិភ័យប្រឈមនឹងសុខភាព និងការប្រែប្រួលអាកាសធាតុ និងទទួលយកទៅអនុវត្តដើម្បីធានាធ្វើយ៉ាងណាឱ្យខ្លួនយើងមានសុខភាពល្អ។ សង្ឃឹមថាក្មួយៗនឹងជួយអប់រំផ្សព្វផ្សាយបន្តដល់មិត្តភក្តិ (មិត្តអប់រំមិត្ត) បងប្អូននៅក្នុងក្រុមគ្រួសារ និងសហគមន៍ឱ្យបានយល់ដឹងដូចគ្នា និងបានជាប្រយោជន៍មានសុខភាពល្អសម្រាប់ផ្ទាល់ខ្លួនផង សម្រាប់ក្រុមគ្រួសារផង និងរួមគ្នាជាសហគមន៍ដែលមានសុខភាពល្អ ហើយជាពិសេស អាចទប់ទល់បាននឹងការប្រែប្រួលអាកាសធាតុ»។
លោកជំទាវបានបញ្ជាក់បន្ថែមទៀតថា តាមការសិក្សាស្រាវជ្រាវក្នុងរវាងឆ្នាំ២០១៩កន្លងមកនេះ បានបញ្ជាក់ឱ្យឃើញថា កម្ពុជាយើងបានខាតបង់ប្រាក់ក្នុងការព្យាបាលជំងឺមិនឆ្លង ជាពិសេសជំងឺធំៗទាំងបួនមុខរួមមាន ជំងឺមហារីក, ជំងឺទឹកនោមផ្អែម, ជំងឺរលាកផ្លូវដង្ហើមរ៉ាំរ៉ៃ និងជំងឺបេះដូងសរសៃឈាម ដែលចំណាយថវិកាអស់រហូតដល់ប្រមាណមួយពាន់ប្រាំរយលានដុល្លារសហរដ្ឋអាម៉េរិក ក្នុងមួយឆ្នាំ។ ដោយហេតុនេះហើយទើបសម្ដេចកិត្តិព្រឹទ្ធបណ្ឌិតប្រធាន បានអំពាវនាវសុំឱ្យបងប្អូនប្រជាពលរដ្ឋយើង ប្រកាន់ខ្ជាប់នូវទម្លាប់រស់នៅប្រកបដោយសុខភាពល្អ បញ្ចៀសឱ្យបាននូវជំងឺមិនឆ្លងទាំងនោះ ដូចពាក្យចាស់ពោលថា «ស្រឡាញ់ខ្លួន ស្ងួនចំណី»។
ជាចុងក្រោយនេះ លោកជំទាវអគ្គលេខាធិការ បានថ្លែងអំណរគុណយ៉ាងជ្រាលជ្រៅចំពោះសាកល វិទ្យាល័យជាតិគ្រប់គ្រង ជាពិសេសសាកលវិទ្យាធិការ ដែលជាប្រធានកិត្តិយសក្លឹបយុវជន កកាកបាទក្រហមកម្ពុជា និងសម្របសម្រួលគ្រប់លទ្ធភាពឱ្យក្មួយៗយុវជនបានចូលរួមសកម្មភាពមនុស្សធ៌មរបស់កាកបាទក្រហមកម្ពុជា។
លើសពីនេះទៅទៀត រៀងរាល់ទិវា ៨ ឧសភា សាកលវិទ្យាល័យតែងតែឧបត្ថម្ភគាំទ្រថវិកាជារៀងដរាបមក ចំនួន១៣លើកជាប់ៗគ្នា តាំងពីឆ្នាំ ឭ២០០៩ ដល់ឆ្នាំ ២០២៣ កន្លងមកនេះព្រមទាំងផ្តល់អាហារូបករណ៍ជូនកាកបាទក្រហមកម្ពុជារហូតមកដែរ និងសូមជូនពរលោកបណ្ឌិតសាកលវិទ្យាធិការរង លោកស្រីសាស្ត្រាចារ្យ លោកគ្រូ អ្នកគ្រូ និងនិស្សិតទាំងអស់នៃសាកលវិទ្យាល័យជាតិគ្រប់គ្រង បានប្រកបដោយព្រះពុទ្ធពរទាំង៤ ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
