នាយករដ្ឋមន្ត្រី បញ្ជាឱ្យបង្ក្រាបរាល់បុគ្គលទាំងឡាយណាដែលមានចេតនា បំផ្លាញសំណង់ប្រវត្តិសាស្ត្ររបស់កម្ពុជា
ភ្នំពេញ៖ នៅក្នុងពិធីអបអរសាទរទិវាវប្បធម៌ ៣ មីនា ដែលរៀបចំឡើងនាល្ងាចថ្ងៃទី០៧ ខែមីនា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាឱ្យក្រសួងវប្បធម៌ និងវិចិត្រសិល្បៈ ជាមួយក្រសួងពាក់ព័ន្ធ ត្រូវចូលរួមបង្ក្រាបឱ្យបានទាន់ពេលវេលា រាល់បុគ្គលទាំងឡាយណាដែលមានចេតនា បំផ្លាញសំណង់ប្រវត្តិសាស្ត្ររបស់កម្ពុជា។
សម្ដេចក៏បានណែនាំដល់ក្រសួងពាក់ព័ន្ធត្រូវបន្តរួមគ្នា ធ្វើបញ្ជីរសារពើភ័ណ្ឌគ្រប់ទីតាំងនៃបេតិកភណ្ឌរូបិយឱ្យបានសព្វគ្រប់ ដើម្បីជៀសវាងការរំលោភបំពានហើយសូមទាមទារមកវិញរាល់សម្បត្តិវប្បធម៌របស់ជាតិ ដែលបានបាត់បង់ក្នុងសម័យសង្គ្រាម។
ជាមួយគ្នានោះ សម្ដេចធិបតី ក៏បានបញ្ជាឱ្យក្រសួងវប្បធម៌ធ្វើការជាមួយក្រសួងទេសចរណ៍ ដើម្បីផ្សព្វផ្សាយនូវសក្ដានុពលទេសចរណ៍វប្បធម៌ជាតិឱ្យបានទូលំទូលាយ តាមគ្រប់រូបភាព សម្រាប់ទេសចរណ៍ជាតិ និងអន្តរជាតិ សំដៅលើកកម្ពស់វប្បធម៌ជាតិ រួមចំណែកជំរុញកំណើនសេដ្ឋកិច្ចជាតិ កាត់បន្ថយភាពក្រីក្រ៕
