ឯកឧត្តម អ៊ូច ភា ផ្ញើសារលិខិតគោរពជូនពរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសទិវាអន្តរជាតិនារី ៨ មីនា ខួបលើកទី១១៣ ឆ្នាំ២០២៤

ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ បានផ្ញើសារលិខិតគោរពជូនពរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសទិវាអន្តរជាតិនារី ៨ មីនា ខួបលើកទី១១៣ ឆ្នាំ២០២៤ ក្រោមប្រធានបទ “ស្ត្រី និងក្មេងស្រី ក្នុងបរិវិត្តកម្មឌីជីថល”។

ក្នុងឱកាសអបអរសាទរខួបលើកទី១១៣ នៃទិវាអន្តរជាតិនារី ៨ មីនា ឆ្នាំ២០២៤ ក្រោមប្រធានបទ “ស្ត្រី និងក្មេងស្រី ក្នុងបរិវិត្តកម្មឌីជីថល” ក្នុងនាមក្រុមប្រឹក្សាខេត្ត គណៈអភិបាលខេត្ត កងកម្លាំងប្រដាប់អាវុធទាំងបីប្រភេទ មន្ត្រីរាជការ ព្រះសង្ឃ លោកគ្រូ អ្នកគ្រូ និស្សិត សិស្សានុសិស្ស ព្រមទាំងប្រជាពលរដ្ឋទូទាំងខេត្តតាកែវ និងក្នុងនាម ខ្លួនខ្ញុំបាទផ្ទាល់ សូមឧទ្ទិសបួងសួងដល់ គុណបុណ្យ បារមី វត្ថុស័ក្តិសិទ្ធិក្នុងលោក ប្រទានពរជ័យសព្ទសាធុការពរ ជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមសម្តេច មានសុខភាពល្អ បរិបូរណ៍ កាយពលមាំមួន បញ្ញាញាណភ្លឺថ្លា ឈ្លាសវៃ និងមានជន្មាយុយឺនយូរ ដើម្បីបន្តបេសកកម្មដ៏ឧត្តុង្គឧត្ដម ក្នុងការដឹកនាំស្ថាប័នកាកបាទក្រហមកម្ពុជា បំពេញសកម្មភាពមនុស្សធម៌ ដែលបានជួយដល់ប្រជាពលរដ្ឋទូទៅ ជាពិសេសលើកកម្ពស់សិទ្ធិនារីឱ្យមានការចូលរួមគ្រប់សកម្មភាពសង្គមនឹងគ្រប់វិស័យ។

ឆ្លៀតក្នុងឱកាសដ៏បវរមហាប្រសើរនេះដែរ យើងខ្ញុំទាំងអស់គ្នា សូមសម្តែងនូវមោទនភាព និងកោតសរសើរបំផុត និងចងចាំជានិច្ច ចំពោះសកម្មភាពប្រកបដោយវីរភាពដ៏ប្រសើរថ្លៃថ្លារបស់ សម្តេចកិត្តិព្រឹទ្ធបណ្ឌិត ដែលសម្តេច ខិតខំលះបង់អស់ពីកម្លាំងកាយ ចិត្ត ប្រាជ្ញា ស្មារតី ក្នុងការរួមចំណែកយ៉ាងធំធេង ដើម្បីការពារសិទ្ធិស្ត្រី លើកទឹកចិត្តឱ្យមានការចូលរួមរបស់ស្ត្រីគ្រប់សកម្មភាពដោយស្មើសិទ្ធិ ស្មើភាពក្នុងសង្គម លើកកម្ពស់សិទ្ធិស្ត្រីនិងគាំពារកុមារ លើគ្រប់កាលៈ ទេសៈទាំងវិស័យ័ នយោបាយ សេដ្ឋកិច្ចនិងសង្គមកិច្ច ជាពិសេសការបំពេញបេសកកម្មដ៏ឧត្តុង្គឧត្ដម ដើម្បីដឹកនាំស្ថាប័នកាកបាទក្រហមកម្ពុជា ក្នុងសកម្មភាពវិស័យមនុស្សធម៌យ៉ាងផុសផុល។

ជាថ្មីម្តងទៀត ក្នុងនាមក្រុមប្រឹក្សាខេត្ត គណៈអភិបាលខេត្ត កងកម្លាំងប្រដាប់អាវុធទាំងបីប្រភេទ មន្ត្រីរាជការ ព្រះសង្ឃ លោកគ្រូ អ្នកគ្រូ និស្សិត សិស្សានុសិស្ស ព្រមទាំងប្រជាពលរដ្ឋទូទាំងខេត្តតាកែវនិងក្នុងនាមខ្លួនខ្ញុំបាទ ផ្ទាល់ សូមគោរពសម្តែងនូវភក្ដីភាព និងកតញ្ញូតាធម៌ដ៏ជ្រាលជ្រៅបំផុត និងសូមបួងសួងដល់ វត្ថុស័ក្តិសិទ្ធិទាំងឡាយ ក្នុងលោក ទេវតាទាំងមួយម៉ឺនលោកធាតុ តាមបីបាច់ ថែរក្សា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេច អគ្គមហាសេនាបតីតេជោ ព្រមទាំងបុត្រា បុត្រី ចៅប្រុស ចៅស្រី សូមជួបតែសេចក្តីសុខ សុភមង្គលនិងប្រកបដោយ ពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕