ឯកឧត្តមរដ្ឋមន្ត្រី ថោ ជេដ្ឋា ផ្ញើសារលិខិតគោរពជូនពរ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ក្នុងឱកាសទិវាអន្តរជាតិនារី ៨ មីនា ខួបលើកទី១១៣ ឆ្នាំ២០២៤

ភ្នំពេញ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានផ្ញើសារលិខិតគោរពជូនពរ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍ កាកបាទក្រហមកម្ពុជា ក្នុងឱកាសទិវាអន្តរជាតិនារី ៨ មីនា ខួបលើកទី១១៣ ឆ្នាំ២០២៤ ក្រោមមូលបទ “ស្ត្រី និងក្មេងស្រី ក្នុងបរិវត្តកម្មឌីជីថល”។

ក្នុងឱកាសដែលនារីនៅលើសកលលោក និងនៅក្នុងព្រះរាជាណាចក្រកម្ពុជា ចូលរួមអបអរសាទរទិវាអន្តរជាតិនារី ៨ មីនា ខួបលើកទី១១៣ ឆ្នាំ២០២៤ ក្រោមមូលបទ “ស្ត្រី និងក្មេងស្រី ក្នុងបរិវត្តកម្មឌីជីថល” ប្រកបដោយសេចក្តីសោមនស្ស រីករាយ យើងខ្ញុំទាំងអស់គ្នា ជាថ្នាក់ដឹកនាំ មន្ត្រីរាជការនៃក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប សូមសម្តែងនូវមនោសញ្ចេតនាគោរពស្រលាញ់ដ៏ស្មោះស្ម័គ្រ និងសូមគោរពជូននូវសព្ទសាធុការ ពរជ័យបវរមហាប្រសើរថ្លៃថ្លាជូនចំពោះ លោកជំទាវបណ្ឌិត អនុប្រធានអចិន្ត្រៃយ៍ សូមមានសុខភាពល្អបរិបូរណ៍ កម្លាំងពលំមាំមួន បញ្ញាញាណភ្លឺថ្លា មានជន្មាយុយឺនយូរ បន្តសម្រេចបានជោគជ័យថ្មីៗបន្ថែមទៀតលើគ្រប់ភារកិច្ចការងារ និងការបំពេញបេសកកម្មដ៏ឧត្តុង្គឧត្តមជាប្រវត្តិសាស្ត្រ ដើម្បីរួមចំណែកដឹកនាំក្នុងបុព្វហេតុមនុស្សធម៌កាន់តែរឹងមាំ។

យើងខ្ញុំទាំងអស់គ្នា សូមសម្តែងនូវសេចក្តីជឿជាក់ចំពោះសមត្ថភាព និងទេពកោសល្យដ៏ប៉ិនប្រសប់ប្រកបដោយ ភាពប្រាកដនិយម និងសូមកោតសរសើរដោយស្មោះចំពោះវីរភាពដឹកនាំ និងក្នុងនាមជាឧត្តមភរិយារបស់ សម្តេចមហាបវរធិបតី នាយករដ្ឋមន្ត្រី លោកជំទាវបណ្ឌិត អនុប្រធានអចិន្ត្រៃយ៍ គឺជាស្ត្រីទីមួយវ័យក្មេងដ៏ឆ្នើម ដែលតែងយកចិត្តទុកដាក់លើកកម្ពស់សមត្ថភាព សីលធម៌ គុណធម៌ សិទ្ធិអំណាចរបស់ស្ត្រី និងក្មេងស្រី ព្រមទាំងគិតគូរ ពីសុខភាពសាធារណៈជូនដល់ប្រជាជនកម្ពុជាគ្រប់រូប ប្រកបដោយចរិយាសម្បត្តិល្អប្រពៃថ្លៃថ្លា មានឆន្ទៈមោះមុត និងអង់អាច ដឹកនាំកម្លាំងមនុស្សធម៌ សមាគមកាយឫទ្ធិនារីកម្ពុជា ក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) ធ្វើសកម្មភាព យ៉ាងផុលផុស និងការលើកកម្ពស់គុណតម្លៃនៃការចូលរួមរបស់ប្រជាជនគ្រប់មជ្ឈដ្ឋាន ធានាបាននូវនិរន្តរភាព។

ក្នុងឱកាសដ៏ថ្លៃថ្លានេះ យើងខ្ញុំទាំងអស់គ្នា សូមឧទ្ទិសបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងអស់ ក្នុងលោក សូមជួយអភិបាលប្រោះព្រំគ្រងរក្សា លោកជំទាវបណ្ឌិត អនុប្រធានអចិន្ត្រៃយ៍ និងសម្តេចមហាបវរធិបតី នាយកដ្ឋមន្ត្រី ព្រមទាំងបុត្រីបុត្រាជាទីស្រឡាញ់ សូមបានប្រកបដោយពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូមលោកជំទាវបណ្ឌិត អនុប្រធានអចិន្ត្រៃយ៍ មេត្តាទទួលនូវការគោរពស្រឡាញ់ដ៏ជ្រាលជ្រៅអំពីយើងខ្ញុំ ៕