ឧត្តមសេនីយ៍ទោ សោម ស៊ុន ដាក់បទបញ្ជាដល់កម្លាំង តំបន់ប្រតិបត្តិការសឹករងកំពង់ធំ ត្រូវប្ដេជ្ញាចិត្តដាច់ខាតការពារជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅព្រឹកថ្ងៃទី១១ ខែមីនា ឆ្នាំ២០២៤ បានដឹកនាំកិច្ចប្រជុំផ្សព្វផ្សាយសភាពការណ៍ថ្មីៗ និងប្រគល់ភារកិច្ចចាំបាច់មួយចំនួន ជូនដល់កងកម្លាំងចំណុះទីបញ្ជាការតំបន់ប្រតិបត្តិការសឹករងកំពង់ធំ ។
ឧត្តមសេនីយ៍ទោ សោម ស៊ុន បានគូសបញ្ជាក់អំពីសភាពការណ៍ជាតិ សភាពការណ៍អន្តរជាតិ និងការអភិវឌ្ឍរីកចម្រើនថ្មីៗបន្ថែមទៀតរបស់ព្រះរាជាណាចក្រកម្ពុជា ក្នុងអាណត្តិទី៧ នៃរាជរដ្ឋាភិបាលថ្មី ដែលដឹកនាំដោយសម្ដេចមហាបវរធិបតី ហ៊ុន ម៉ាណែត កំពុងដំណើរការបោះជំហានយ៉ាងស្វាហាប់ឆ្ពោះទៅមុខ ដោយមានការគាំទ្រយ៉ាងពេញទំហឹងពីប្រជាជនកម្ពុជា និងកំពុងទទួលបានជោគជ័យថ្មីៗនៅលើឆាកអន្តរជាតិ ។
ឧត្តមសេនីយ៍ទោ សោម ស៊ុន បានផ្សព្វផ្សាយបទបញ្ជាថ្មីៗរបស់សម្ដេចមហាបវរធិបតី ហ៊ុន ម៉ាណែត ពាក់ព័ន្ធបញ្ហាគ្រឿងញៀន ដែលត្រូវលុបបំបាត់ឲ្យបានដាច់ខាតនៅក្នុងជួរមន្ត្រីរាជការគ្រប់លំដាប់ថ្នាក់ ពិសេសកងកម្លាំងប្រដាប់អាវុធគ្រប់ប្រភេទ ព្រមទាំងការលុបបំបាត់ល្បែងស៊ីសងខុសច្បាប់ មិនឲ្យកើតមានឡើងនៅក្នុងមូលដ្ឋាននានា និងការគ្រប់គ្រងធនធានធម្មជាតិ ពិសេសដីព្រៃលិចទឹកនៅក្នុងតំបន់៣ ជាប់មាត់បឹងទន្លេសាប ។
ឧត្តមសេនីយ៍ទោ សោម ស៊ុន បានដាក់បទបញ្ជាដល់កងកម្លាំងចំណុះឲ្យបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវប្ដេជ្ញាចិត្តដាច់ខាតការពារជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់ ដែលកើតឡើងពីការបោះឆ្នោត និងដាច់ខាតត្រូវរក្សាឲ្យបានសុខសន្តិភាពដែលយើងកំពុងមានដូចសព្វថ្ងៃនេះ ឲ្យនៅគង់វង្សជារៀងរហូត ។
ជាមួយនោះដែរ ត្រូវត្រៀមបម្រុងកម្លាំង មធ្យោបាយ និងគ្រឿងបំពាក់គ្រប់គ្រាន់ ដើម្បីចល័តអន្តរាគមន៍តាមបទបញ្ជារបស់ថ្នាក់លើ ឲ្យទាន់ពេលវេលា និងត្រូវទៅបម្រើប្រជាជននៅតាមមូលដ្ឋាននានា ដោយស្មោះអស់ពីចិត្តពីថ្លើម ដោយអនុវត្តតាមទិសស្លោក កងទ័ពជាកូនចៅរបស់ប្រជាជន អ្វីៗដើម្បីប្រជាជន ៕
