សម្តេចធិបតី មិនជឿថាមានមន្ត្រីជាន់ខ្ពស់ក្រសួងសេដ្ឋកិច្ច និយាយផលអវិជ្ជមាន គម្រោងព្រែកជីកហ្វូណនតេជោ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មិនជឿថាមានមន្ត្រីជាន់ខ្ពស់ក្រសួងសេដ្ឋកិច្ចនិងហិរញ្ញវត្ថុ និយាយផលអវិជ្ជមាន លើគម្រោងព្រែកជីកហ្វូណន-តេជោ ដូចការផ្សាយរបស់វិទ្យុបម្រើបរទេស ខេមបូឌាដេលី ដែលផ្សាយបំភ្លៃ ពាក់ព័ន្ធនឹងគម្រោងព្រែកជីកនេះ ដែលវិទ្យុមួយនេះតែងតែអះអាងថា បានប្រភពព័ត៌មានពីមន្ត្រីជាន់ខ្ពស់ក្រសួងសេដ្ឋកិច្ច ។
ក្នុងឱកាសអញ្ជើញពិនិត្យការដ្ឋានសាងសង់ អាកាសយានដ្ឋានអន្តរជាតិតេជោ នៅស្រុកកណ្តាលស្ទឹង ខេត្តកណ្តាល នាថ្ងៃទី១២ ខែមីនា ឆ្នាំ២០២៤ សម្ដេចធិបតី ហ៊ុន ម៉ាណែត មានប្រសាសន៍ថា គម្រោងព្រែកជីកហ្វូណន-តេជោនេះ ជាគម្រោង BOT ដែលរដ្ឋអត់មានខ្ចីលុយគេទេ។ គម្រោងព្រែកជីកហ្វូណន-តេជោ ក៏មិនមែនធ្វើបានសម្រាប់តែផ្ទះលើទឹកតូចៗ និងទូកនេសាទតូចៗ នោះដែរ តែមានសមត្ថភាពដឹកជញ្ជូនរហូតដល់ទៅ ៣ពាន់តោនឯណោះ។
សម្ដេចធិបតី បញ្ជាក់ថា «អ្នកខ្លះមួយថ្ងៃៗ វ៉ៃតែព្រែកជីកហ្វូណន ថាព្រែកជីកហ្វូណនធ្វើអត់ប្រយោជន៍ ថាធ្វើបានតែផ្ទះលើទឹក ទូកតូចៗ រកត្រីតូចតាច។ ខ្ញុំសូមបញ្ជាក់ថា មានវិទ្យុមួយនោះឧស្សាហ៍និយាយថា មន្ត្រីជាន់ខ្ពស់ក្រសួងសេដ្ឋកិច្ច និងហរិញ្ញវត្ថុ បាននិយាយថា គម្រោងព្រែកជីកហ្វូណននេះ ជាគម្រោងអត់បានការ ហើយគ្មានបានផលប្រយោជន៍ខ្មែរបន្តិចសោះ។ ខ្ញុំថា ទីមួយ កុំទៅលាបពណ៌មន្ត្រីជាន់ខ្ពស់ ហើយទីពីរ បើមន្ត្រីជាន់ខ្ពស់ក្រសួងសេដ្ឋកិច្ច និយាយបែបហ្នឹង ខ្ញុំមិនជឿទេ។ ខ្ញុំមិនជឿថាមានមន្ត្រីកម្ពុជាណា ដែលមិនយល់ហេតុផល ថាកម្ពុជាយកកន្លែងហ្នឹងជាកន្លែង ជំពាក់លុយគេវ័ណ្ឌក»។
សូមបញ្ជាក់ថា គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ត្រូវបានប្រសិទ្ធនាមថាគម្រោង «ព្រែកជីកហ្វូណនតេជោ» នាសម័យប្រជុំពេញអង្គគណៈរដ្ឋមន្ត្រីនីតិកាលទី៦ នៃរដ្ឋសភា កាលពីថ្ងៃទី១៩ ខែឧសភា ឆ្នាំ២០២៣កន្លងទៅ។ រាជរដ្ឋាភិបាល បានសម្រេចបង្កើតគណៈកម្មការអន្តរក្រសួង ដើម្បីដំណើរការអនុវត្តគម្រោងនេះផងដែរ។ គម្រោង «ព្រែកជីកហ្វូណនតេជោ» ប្រវែង ១៨០គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៉ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប។ ផ្លូវទឹកនេះនឹងមានទទឹងមុខកាត់ផ្នែកខាងលើប្រវែង១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ និងជម្រៅទឹកប្រមាណ ៥,៤ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) មានគន្លងនាវាចរណ៍ចំនួន ២គន្លង អាចចេញ-ចូល និងជៀសគ្នាបានដោយសុវត្ថិភាព ៕
