រដ្ឋបាលរាជធានីភ្នំពេញ អំពាវនាវអ្នកមានធនធានចង់បរិច្ចាគអំណោយឧបត្ថម្ភកងទ័ពជួរមុខនៅព្រំដែន
ភ្នំពេញ៖ នៅថ្ងៃទី១១ ខែមីនា ឆ្នាំ២០២៤ រដ្ឋបាលរាជធានីភ្នំពេញ បានអំពាវនាវអ្នកមានធនធានទាំងអស់ រាប់គិតចាប់ពីថ្នាក់ឯកឧត្តម អ្នកឧកញ៉ា លោកឧកញ៉ា លោកជំទាវ ពាណិជ្ជករ សិប្បករ វិនិយោគិន និងសប្បុរសជន អភិបាលខណ្ឌ ប្រធានមន្ទីរ អង្គភាពជុំវិញសាលារាជធានីភ្នំពេញ ឱ្យចូលរួមបរិច្ចាគ ថវិកា និងអំណោយ ដើម្បីឧបត្ថម្ភដល់កងទ័ពការពារតាមបន្ទាតព្រំដែនជួរមុខ ក្រោមហេតុផលវប្បធម៌នៃការចែករំលែក។
រដ្ឋបាលរាជធានីភ្នំពេញ បានបញ្ជាក់ថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ គណៈអភិបាលរាជធានីភ្នំពេញ នឹងដឹកនាំគណៈប្រតិភូ ចុះសួរសុខទុក្ខកងយុទ្ធពលខេមរភូមិន្ទ ដែលជាសម្ព័ន្ធមេត្រីភាពជាមួយររដ្ឋបាលរាជធានីភ្នំពេញ។ កងយុទ្ធពលខេមរភូមិន្ទទាំងនោះរួមមាន៖ កងពលធំអន្តរាគមន៍លេខ៣ កងពលតូចអន្តរាគមន៍លេខ៩ វរៈនគរបាលការពាររព្រំដែនលេខ៧៩៣ ឈរជើងការពាររនៅខ្សែក្រវាត់ព្រំដែន ប្រចាំទិសប្រាសាទព្រះវិហារ និងកងពលតូចអន្តរាគមន៍លេខ១២៨ ឈរជើងការពាររនៅតំបន់ អូរអាឡៃ ស្រុកសៀមបាំង ខេត្តស្ទឹងត្រែង។
រដ្ឋបាលរាជធានី បានបន្ថែមថា ដើម្បីឱ្យការចុះសួរសុខទុក្ខនេះទទួលជោគជ័យ បង្ហាញពីមនោសញ្ចេតនាដ៏ជ្រាលជ្រៅ ក្នុងការចូលរួមលើកទឹកចិត្តដល់យុទ្ធជនតាមបន្ទាត់ព្រំដែនជួរមុខ រដ្ឋបាលរាជធានី អំពាវនាវដល់អ្នកមានធន់ធានទាំងអស់ចូលរួមបរិច្ចាគអំណោយជាថវិកា ស្បៀងអាហារ ឬសម្ភារប្រើប្រាស់ផ្សេងៗតាមលទ្ធភាព និងសទ្ធាជ្រះថ្លា ដើម្បីរួមចំណែកឧបត្ថម្ភជូនដល់កងទ័ព និងក្រុមគ្រួសារកងទ័ពការពារទឹកដីនៅតាមបន្ទាត់ព្រំដែនជួរមុខ។
គួរជម្រាបថា សប្បុរសជនដែលចង់បរិច្ចាគអំណោយទាំងអស់ អាចយកទៅប្រគល់ជូននៅទីចាត់ការហិរញ្ញវត្ថុ សាលារាជធានីភ្នំពេញ រៀងរាល់ម៉ោងធ្វើការ ឬតាមរយៈលេខទូរសព្ទ និងលេគណនី ធនាគារ ដែលមានភ្ជាប់នៅលើសេចក្តីអំពាវនាវរបស់រដ្ឋបាលរាជធានីភ្នំពេញ។
ទន្ទឹមនឹងការអំពាវនាវនេះអាជ្ញាធរសង្ឃឹមជឿជាក់លើស្មារតី និងទឹកចិត្តសប្បុរសធម៌ របស់ទាំងអស់ ដែលជាវប្បធម៌ នៃការចែករំលែក របស់ប្រជាជាតិយើង ៕
