សម្ដេចធិបតី៖ គ្រូពេទ្យពុំមែនជាទេវតា តែត្រូវពង្រឹងសមត្ថភាព ជំនាញវិជ្ជាជីវៈ ឲ្យបានច្បាស់លាស់

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានថ្លែងថា ក្រុមគ្រូពេទ្យពុំមែនជាទេវតាឡើយ ប៉ុន្តែត្រូវពង្រឹងសមត្ថភាព ជំនាញវិជ្ជាជីវៈ បំពាក់សម្ភារបរិក្ខារសុខាភិបាលឲ្យកាន់តែទំនើបគ្រប់គ្រាន់ ដើម្បីព្យាបាលប្រជាពលរដ្ឋឲ្យមានប្រសិទ្ធភាព។

ក្នុងឱកាសអញ្ជើញជាអធិបតីសម្ពោធដាក់ឲ្យប្រើប្រាស់ជាផ្លូវការ មន្ទីរពេទ្យតេជោសែន កោះធំ ស្ថិតនៅក្នុងស្រុកកោះធំ ខេត្តកណ្តាល នាព្រឹកថ្ងៃ១៣ ខែមីនា ឆ្នាំ២០២៤ សម្ដេចធិបតី ហ៊ុន ម៉ាណែត បានមានប្រសាសន៍ថា ពេទ្យត្រូវមានជំនាញ និងការសម្រេចចិត្ដ ដើម្បីជួយសង្គ្រោះជីវិតប្រជាពលរដ្ឋ ហើយក្រុមគ្រូពេទ្យមិនមែនជាទេវតាឡើយ។

សម្ដេចធិបតី បានបន្តថា ពេទ្យធ្វើការងារទេវតា មិនមែនជាទេវតាទេ ពេទ្យជួយមនុស្សឈឺឲ្យជា មនុស្សដែលអាចហានិភ័យនៃការស្លាប់ជួយសង្គ្រោះបាន។ សម្តេចថា ពេទ្យមិនមែនជាទេវតា ដែលធ្វើការងារទេវតា។ ទេវតាអាចប្រោះព្រំបានទាំងអស់ តែយើងបានតែព្យាបាល។ ប៉ុន្ដែដើម្បីឲ្យពេទ្យធ្វើការងារទេវតាឲ្យបានល្អប្រសើរ ត្រូវតែមានគ្រឿងបំពាក់ហេដ្ឋារចនាសម្ព័ន្ធ ថ្នាំ និងការបណ្ដុះបណ្ដាល ឲ្យបានច្បាស់លាស់។

ជាមួយគ្នានេះ សម្ដេចធិបតី នាយករដ្ឋមន្ត្រី ក៏បានកោតសរសើរចំពោះវឌ្ឍនភាពការងាររបស់ក្រសួងសុខាភិបាលដែលបានខិតខំក្នុងការបំពេញការងារព្យាបាលជំងឺពលរដ្ឋ។ សម្ដេចថា សមិទ្ធផលជាច្រើន ដែលរាជរដ្ឋាភិបាលសម្រេចបានក្នុងការអភិវឌ្ឍ-សង្គមសេដ្ឋកិច្ចកម្ពុជា ក្នុងអំឡុងពេលជាង២ទស្សវត្សចុងក្រោយ និងមិនអាចកើតឡើង ប្រសិនបើកម្ពុជាមិនមានសន្ដិភាពពេញលេញ ស្ថិរភាពនយោបាយ និងសន្ដិសុខសង្គម។ កត្តាទាំងនេះ ធ្វើឲ្យកម្ពុជា មានការអភិវឌ្ឍលើគ្រប់វិស័យ ក្នុងនោះ ក៏មានវិស័យសុខាភិបាលផងដែរ ៕