សម្តេចធិបតី៖ តាមរយះការគាំទ្រ និងជឿទុកចិត្តពីប្រជាពលរដ្ឋ ទើបសមិទ្ធផលជាច្រើនមានភាពរីកចម្រើន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងអំណរអរគុណជូនដល់ប្រជាពលរដ្ឋនៅស្រុកកោះធំ ខេត្តកណ្តាល ដែលភាគច្រើន បានផ្តល់ការទុកចិត្ត និងជឿជាក់លើការដឹកនាំរបស់គណបក្សប្រជាជនកម្ពុជា នៅក្នុងរយះពេលជាង ៤០ឆ្នាំកន្លងមកនេះ។
សម្តេចធិបតី ហ៊ុន ម៉ាណែត បានថ្លែងបែបនេះ ក្នុងឱកាសដែលសម្តេចអញ្ជើញជាអធិបតីក្នុងពិធីសម្ពោធមន្ទីរពេទ្យតេជោសែន កោះធំ ស្ថិតនៅស្រុកកោះធំ ខេត្តកណ្តាល នៅព្រឹកថ្ងៃទី១៣ ខែមីនា ឆ្នាំ២០២៤។
សម្តេចធិបតី ហ៊ុន ម៉ាណែត បានថ្លែងបន្តថា តាមរយៈការបោះឆ្នោតគាំទ្រយ៉ាងច្រើនកុះករ ផ្តល់នូវទំនុកទុកចិត្ត ផ្តល់ឱកាសជូនគណបក្សប្រជាជនកម្ពុជាដឹកនាំប្រទេសបន្ត ដើម្បីបម្រើប្រជាពលរដ្ឋ ហើយការគាំទ្រនេះ ពិតជាសំខាន់ក្នុងការផ្តល់លទ្ធភាពដល់រាជរដ្ឋាភិបាល ក្នុងការដាក់ចេញគោលនយោបាយ និងដាក់ចេញនូវឱកាសកសាងសមិទ្ធផលបន្ថែមជូនដល់ប្រជាពលរដ្ឋនៅស្រុកកោះធំ និងនៅទូរទាំងប្រទេសតែម្តង។
សម្តេចធិបតី នាយករដ្ឋមន្ត្រី ក៏បានបញ្ជាក់ថា អោយតែប្រជាជនផ្តល់ឱកាស គឺគណបក្សប្រជាជនកម្ពុជា នៅប្រជាជន និងធ្វើសមិទ្ធផលទៅតាមកិច្ចសន្យាដោយមិនមានការភូតភរកុហកនោះទេ ៕
